Топилницата избришана од картата на Велес
Топилницата повеќе не постои на картата на Велес. На локацијата на која сега се наоѓа фабриката ќе се подигнува зелен појас. Иницијативата на градот ја поддржа министерството за транспорт и врски и дозволи промена на Генералниот Урбанистички план на градот.
Наместо производствени погони и јаловина, на површината од 45 хектари, ќе треба да се засадат садници и подигне шума. Сега останува уште Советот на општината да ја изгласа одлуката.
„На останатиот дел од локацијата е зацртано да се изгради сообраќајна и комунална инфраструктура. Бришејќи ја Топилницата од целокупната планска документација се стави крај на децениската борба на велешани за здрава животна средина, рече Славчо Чадиев, градоначалник на Велес.
Но ова не е крај на еколошката војна. Граѓаните имаат уште една сериозна закана исто голема колку и фабриката. За депонијата на која во изминатите триесет години се складираа 900 илјади тони оловна, цинкова и кадмиумова згура е исто опасна колку и фабриката, предупредуваат експертите. Неа досега државата не успеа да ја продаде на два тендери. Тие пропаднаа бидејќи нема заинтересиран купувач.
„Во постојан контакт сме со министерствата за животна средина и за економија и се надеваме дека во најскоро време ќе успееме и згурата да ја тргнеме од градот и тогаш конечно до крај да го решиме овој проблем, рече Чадиев.
Експертите постојано апелираат и како единствено добро решение го посочуваат комплетното затворање на депонијата врз која исто така треба да се подигне зелен појас. /Б.Н