Опозицијата излезе со дел од имињата на можните велешки кандидати за пратеници, партиите од власта тактизираат!

Со имињата на досегашните пратеници Илија Димовски и Ѓорѓи Коџобашиев и претседателот на општинскиот комитет и на советот на општина Велес, Александар Колев до сега се калкулира и шпекулира дека се можните кандидати за пратеници од Велес на листата во третата изборна единица од редовите на ВМРО ДПМНЕ.

Според непотврдени информации можно е Димовски кој е и директор на центарот за комуникација на партијата да биде и носител на листа, место кое на досегашните парламентарни избори беше резервирано за Влатко Ѓорчев. Ваквите информации за сега не ги потврдуваат од општинскиот комитет на партијата.

„ Партијата си има избор  преку транспарентна постапка која се одвива преку кандидатура на своја иницијатива или пак на предлог на комитетот исто како што е и за кандидат за претседател на државата, за градоначалник и советници. За сега е рано да се зборува за имиња, во наредните десетина дена очекуваме да се одржи конвенција на која ќе се дефинираат листите. Ова е стандардна пракса“, рече Александар Колев, претседател на општински комитет на ВМРО ДПМНЕ.

За разлика од владеачката партија, опозициската СДСМ веќе и официјално објави дел од имињата на можните кандидати за пратеници од Велес.

„До централата испративме 38 предлози од велешкиот огранок кои би сакале да се најдат на листата за третата избона едница. Меѓу нив е претседателот на општинскиот огранок и досегашен пратеник Маријанчо Николов, поранешните советници во општинскиот совет Данчо Стојановски, Весна Богоевска, Дејан Гавазов, секретарот и советник Благој Коларов и Панче Иванов како и Марија Минова. Веќе утре или задутре ќе се дефинираат предлозите, а изборот ќе падне в недела на конвенција“, рече Маријанчо Николов, претседател на општинска организација.

Од помалите досегашни коалициони партии од опозицијата исто така обелоденија дел од можните каднидати. Либерално демократската партија ќе ги предложи претседателката и член на совет Елена Тевчева и поранешната советничка Евтимија Карбева Лукарова. Новата социјал демократска партија на Тито Петковски пак за третата изборна единица ќе може да бира од предлозите, секретарот Митрев Ѕвонко, претседателката на младите Билјана Вељановска и портпаролот Владимир Трајковски. Сепак листите се уште не се дефинирани и ќе се чека одржувањето на седниците на централните одбори.

Од новоформираната Гром на Стевчо Јакимовски пак најверојатни кандидати од Велес ќе бидат, претседателот на општинскиот огранок Штерјо Николов, претседателката на жените Валендтина Дукова и претседателот на младите Благојче Димитриевски. Од таму велат дека сериозен кандидат за носител на листата гледаат во претседателот Николов./Б.Н.