Д-р Атанас Василев: Пациентите да ни бидат задоволни и да имаат убав збор за нас
Вработените во велешката болница денеска го одбележаа светскиот ден на здравјето. Директорот Атанас Василев им посака здравје и успешна кариера, а на најхуманите, крводарителите во бели мантили им додели благодарници.
„На вработените им посакувам пред се здравје, да се задоволни од работата и од примањата и да напредуваат во кариерата, а на пациентите им посакувам многу здравје и да од тука да излезат задоволни од услугата и секогаш да имаат убав збор за нас, рече д-р Атанас Василев.
На денот на здравјето директорот ги соопшти резултатите од досегашното работење на болницата. Установата годинава е со намален долг од седум милиони денари и со реновирани неколку болнички одделенија. Меѓу нив комплетно е реновирано и интерното одделение, а со нова и современа апаратура е обезбедено и хируршкото одделение.
„На ред во програмата на болницата е очното одделение, кое досега работеше со стара опрема. Двајцата лекари се на обука во 8-ми септември во Скопје. Годишно тука се планира да се вградуваат по 500 леќи на пациенти, рече Василев.
На своите поранешни колеги светскиот ден на здравјето им го честита градоначалникот Славчо Чадиев. Со честитката тој им посака болницата во Велес да ја издигнат на ниво на регионална во која квалитетните здравствени услуги ќе бидат пресудни за пациентите од целата држава.
– Не сум со вас една година и особено ми е драго што слушам за постигнати нови резултати. Како мои поранешни колеги сакам да ви соопштам дека секогаш ќе бидам поддршка за проекти со кои се подобрува квалитетот на јавното здравство, рече Чадиев.
Директорот на болницата д-р Атанас Василев најави дека за една седмица во употреба ќе биде пуштено во употреба и реновираното физикално одделение. Но исто така потврди дека на болницата и е потребен дополнителен медицински кадар./Д.С