„Априлилили“ громогласно одекнуваше денеска од грлата на децата во Велес

Разни маски продефилираа низ Младинскиот парк.  Младите велешанчиња го одбележаа денот на шегата, први април. Џагор и шаренило од бои, насмеани детски ликови. Ваква беше денеска глетката во паркот, преполн со децата од основните училишта и градинките. Сите со маските на своите омилени ликови, го одбележаа денот на шегата први април.

Бетмен, Снежана и седумте џуџиња, вештерката, Спајдермен и уште десетици ликови од детските цртани филмови денеска во живо продефилираа низ паркот и градските улици.

„Ние сме обчлечени во Бетмен, бидејќи многу го сакаме цртаниот филм. Затоа сакавме денеска на први април да се преправиме во овие маски.

„Јас сум преправена во цвет, мама ми го направи. Денеска е денот на шегата, ама јас не излажав никого.

„Јас сум преправена во госпоѓа. Маската ја видов во една од турските серии и многу ми се допадна, рекоа низ смеа децата.

Организатор на априлијадата, манифестација која на едно место собира младост, сонце и пролет е локалната самоуправа. Горди се што токму оваа манифестација им ги полни срцата со радост на сите граѓани кои присуствуваат во неа.

„Па еве гледате, тука се собрани сите дечиња, преправени во своите маски и едноставно убаво е човек да е меѓу нив присутен. Оваа манифестација е традиционална и секоја наредна година се трудиме што повеќе да ја збогатуваме со културно уметничка програма“

Но не само што продефилираа низ Младинскиот парк децата од основните училишта и градинката Димче Мирчев си добија и диплома од општината./Д.С