Градоначалникот Чадиев без соодветна одлука на Советот на Општина Велес и правно покритие ги исече а потоа се одважи да понуди документ, кој ќе го регулира третманот и заштитата на повеќе вековните јавори, како и евентуалното сечење на деградираните гранки на јаворите, реагира денеска советничката група на опозицијата предводена од СДСМ. Во нивната реакција нагласија дека јаворите се прогласени за споменици на природата и констатираа дека само Чадиев и ВМРО ДПМНЕ знаат зошто прво се вршеше кастрење на гранките на повеќе вековните јавори на плоштадот Сармаале, а дури потоа се предлага ваква одлука.

– Прашање е како ќе се оправдаат иссечените гранки на јаворите без одлука на општинскиот совет ? Кој ќе одговара за тоа ?, рече советникот на СДСМ, Панче Иванов.

Тој соопшти дека советничката група на СДСМ и коалиционите партнери ги отворила овие дилеми на седницата на Советот и дополнително, не добиле  одговор на поставеното прашање, дали за ваквата одлука се консултирани екологистите во градот.

Иако со нивна помош власта изготвила валидна одлука која ја изгласале, опозицијата, соопшти дека и понатаму ќе бара одговори на прашања кои останале да лебдат во воздухот и на кои ВМРО ДПМНЕ ќе мора да одговори.

Тие се однесуваат на точниот тајминг кога градоначалникот Чадиев ќе предложи ПЛАН за управување со спомениците на природата, во овој случај план за повеќе вековните јавори, во кој ќе бидат утврдени посебните мерки и активности  за заштита, а на што го обврзува Законот за заштита на природата, член 77 став 1  и колку време треба да помине, за локалната власт предводена од ВМРО ДПМНЕ да обезбеди конечно и трајно зачувување на природните карактеристики и специфичните, загрозените или ретките обележја, својства или форми, овдека мислејќи пред се на јаворот кој се наоѓа на Солено чешмиче и кој е во многу тешка состојба .

Од опозицијата повторија дека се залагаат за доследна законска заштита на јаворите како споменици на културата и  инсистираат  што поскоро да се донесе план за управување со спомениците на природата.

Советничката група на СДСМ и коалиционите партнери не се против оплеменување на зелените површини во градот, но се против, тоа да биде на штета на училиштето “Васил Главинов”, на штета на учениците, на штета на екологијата со безмилосното сечење на повеќегодишни листопадни и зимзелени дрвја и што е нај жално, без при тоа да се побара мислење, или да се извести Училишниот одбор – органот на управување на училиштето па ниту Советот на родители, рече на денешната прес конференција кординаторот на советничката група на опозицијата во Советот на општината, Благој Коларов.  Тој во истовреме упати повеќе прашања до локалната власт.

– Дали локалната власт, предводена од ВМРО ДПМНЕ  направи безбедносна процена што ќе значи одземањето на дворот на училиштето, што ќе значи кога учениците излегуваат од училиштето и само на неколку метри пред нив се испречува ограда ? Затвор е тоа или училиште ? Кој ќе ја понесе одговорноста ако недај боже биде загрозена безбедноста во било кој поглед на било кој ученик, предизвикана со одземањето на дворот на училиштето. Ќе си поднесат оставки Градоначалникот, Претседателот на Советот, директорот на училиштето ? Има ли локалната власт направено процена како ќе се одвива наставата во делот на училиштето, каде учат учениците од петто до осмо одделение, во поглед на бучавата која ќе се создава ? Дали за време на одморите, помеѓу наставните часови, учениците ќе престојуваат во училишен двор, или во градски парк, запраша Коларов.

Од СДСМ и коалициските партии сметаат дека содржините кои се предвидени да се направат во сегашниот двор на училиштето, можеле да се направат и без да се одзема дворот на училиштето, без да се поместува оградата, без да се пустошат постоечките дрвја бидејќи дворот на училиштето и онака со децении го користеа граѓаните на Велес во мир и хармонија.

– На крајот, ако навистина крајна цел на локалната власт предводена од ВМРО ДПМНЕ била правење на парк за граѓаните, на само 200 метри, на другата страна на училиштето, спроти Интернатот, имаа простор на располагање. Можеше да се уреди тој дел, без ниту едно дрво да се исече, рече Коларов.

Тој потенцираше дека времето ќе покаже, дали е во прашање правење на парк за граѓаните, или создавање на атрактивна локација за некаква друга намена, од која некој ќе се офајди.

Oпозиција ја праша локалната власт што е со улиците и инфраструктурата кои биле предвидени за изградба со буџетот за 2013 та, па избришани со двата ребалани а ги нема во годинешниов, Буџетот за 2014 година.

–  Во буџетот за 2014 година, не се предвидени за реконструкција улиците Орце Шутев и Ганчо Хаџи Панзов, улицата Благој Страчков – од Влашката црква нагоре, улицата Панче Васков, улицата Благој Нечев, улицата Петре Алчев. Во буџетот за 2014 година не е предвидено ниту изведба на канал за прифаќање на атмосверските води на улицата Алексо Демниевски, спојот на улицата Богдан Каракостев со улицата Ѓорѓи Димитров, улицата Бајрам Хасановиќ во Горно Оризари, Улицата Петре Алчев и повеќе други улици, рече советникот на СДСМ, Панче Иванов..

Зошто во годинешниов Буџет нема решение ниту за проблемот со водоснабдувањето кои со години ги мачи жителите на населбата Порцеланка, праша Иванов. Според СДСМ и коалиционите партнери во Советот на општина Велес, вака предимензиониран, буџетот нема да ги задоволи потребите на велешани ниту ќе го подобри животниот стандард на граѓаните.

–  Сметаме дека е крајно време, локалната власт да ги извади розовите очила, да се соочи со граѓаните и реално, без политики и интриги да им каже што можат да очекуваат од овогодинешниот буџет. И кога и дали воопшто после пет години владеење на ВМРО ДПМНЕ, барем малку ќе мрднат работите од мртва точка ?

Иванов го повтори ставот на советничката група предводена од СДСМ дека се  залагаат за буџет темелен на реалните состојби и услови на локално и државно ниво како и сомневањата дека и годинешниот Буџет ќе ја доживее судбината на ланскиот кој за девет месеци доживеа реализација од само 44 проценти./Д.С