Стопирана соработката меѓу екологистите и локалните власти, причина проектот за чистење на почвата преку рози!
Градските власти и дел од велешките екологисти ја прекинаа соработката поради проектот со кој пред три и пол години се садеа рози за чистење на велешката почва тешка со метали. Од ЕД Вила Зора се лути на општината и ЈКП Дервен бидејќи розите кои беа донација од швајцарската амбасада се откорнати од парковите. Прашуваат каде завршија садниците и која е потребата општината да сади нови преку владиниот проект „Македонија земја на цвеќе, земја на рози“, кога не се грижеше за веќе засадените.
– Редно време е општинските власти да ги запрашаат надлежните во јавното претпријатие каде се розите и зошто не се вратени назад, без разлика кој и да бил одговорен во времето кога тие беа садени па откорнати. Не ми е јасно како сега ќе се садат нови растенија кога не се грижеа за претходните и која е еколошката и економската оправданост за ова, рече Ненад Коциќ претседател на ЕД Вила Зора.
Ниту градоначалникот на Велес, Славчо Чадиев не е задоволен од соработката со екологистите и неодамна својот став јавно го обелодени на средба со новинарите, што е прв пат во заедничката децениска борба на општината и екологитите против загадувањето од топилница. Денеска претавници од општината пак се прогласија за ненадлежни за розите, бидејќи проектот пред три и пол години го поддржале, но не биле соработници.
– Претставници од општината учествуваа во засадувањето садници, но не беа партнери во проектот. Нас ни е жал што се случи ова бидејќи се работеше за еден добар проект, но ќе треба да ги прашате партнерите во проетот за тоа каде се розите, а повеќе за ова не би можела да зборувам, рече Билјана Шуркова Манаскова, еколошки инспектор во општина Велес.
На 9 ти Ноември 2010 година во присутво на поранешниот градоначалник, сегашниот градоначалник, а тогашен претседател на Совет, гости од збратимен град, преставници на ЈКП Дервен и екологисти, започна садењето на 7 илјади рози со цел да се исчисти почвата која е најзагадена во централното градско подрачје и во парковите.
По ова со образложение дека ќе се реконтруираат парковите беа откорнати и до денес цвеќињата не се вратени назад, велат екологистите. Сега општината на првиот ден од пролетта ќе сади нови рози во рамки на проектот на владата, а за свој партнер ги повика бизнисмените од градот кои ќе треба да донираат пари за садниците./Б.Н.
