Велешка „Колска“ доби владина финансиска помош во висина од 30 милиони денари за деблокада на сметката од УЈП
Велешка „Колска“ доби владина помош од 30 милиони денари. Финансиската помош е наменета за подмирување на старите долгови на фабриката за шински возила „Велес“ кон Управата за јавни приходи. Владината одлука донесена е на седница на влада на 25 декември, минатата година, со цел да се помогне единствената фабрика за поправка на товарни и патнички вагони како и да се извади од тешката финансиска состојба за Дума.мк потврди вицепремиерот Фатмир Бетиќи.
-Најголем доверител на велешка „Колска“ е Управата за јавни приходи поради неплатените даноци. Затоа сметавме дека мораме да ја осигураме континуираната работа на фабриката ако како Влада помогнеме да се плати еден дел од долговите. Износот од 30 милиони денари е околу нешто над 50 отсто од долгот што „Колска“ го има кон УЈП. Со тоа се овозможува фабриката да може непречено да функционира во делот на финансиското работење, да се деблокира жиро сметката и во меѓу време како Влада влеговме во сегментот на управување на фабриката со тоа што осигуравме работа за цела 2022 година и не само од јавните претпријатија, „Македонски железници“ – Транспорт и Инфраструктура туку и од приватни оператори коишто имаат потреби од услугите што ги нуди „Колска“, рече Бетиќи.
Вицепремиерот за економски прашања смета дека вака започнатиот процес на помош на велешка „Колска“ на краток рок ќе овозможи сите 90 работници да се вратат на работните места додека на среден рок фабриката да се внесе во реструктуирање. Последново, конкретно значи дека се создаваат услови за влегување на заинтересирани инвеститори во фабриката.
Владината помош треба да овозможи УЈП, која во изминатата скоро една деценија 70 пати ја блокираше жиро сметката на велешка „Колска“, денеска ќе ја одблокира.
-Владата повеќе не смее да толерира такво несоодветно однесување и затоа донесе одлука со овој износ од 30 милиони денари да направи одблокирање на работењето на смета но секој месец менаџерите со изготвен План за репрограмирање на стариот долг и новите обврски од даноци кон УЈП. Со ова Владата покажува дека има нула толеранција кон јавните претпријатија и институции кон други јавни институции а тоа е плаќање на обврските како што се даноци. Сметаме дека не можеме да оперираме во општество во коешто правиме притисок кон приватниот сектор да бидат добри плаќачи а јавниот сектор да ги занемари обврските, додаде Бетиќи.
Планот за репрограмирање на остатокот на долгот на „Колска“ кон УЈП во висина од 30 милиони денари,според вицепремиерот за економски прашања, значи дека велешката фабрика ќе има обврска да го исплати во законскиот рок од 36 месеци. Тоа значи дека месечната обврска на велешката фабрика за шински возила кон УЈП ќе изнесува по околу 833 илјади денари за стариот долг.
Овој износ, според управителот на „Колска“, Митко Јанков фабриката возможно е да го враќа во услови кога би бил обезбеден годишниот обем на работа што конкретно би изнесувал поправка на 120 товарни и 4 патнички вагони со дополнително обезбедена услуга како во случајот со фирмата „Оилко“ која на репарирање им донесе 10 цистерни за нафта минатата година, уште 10 пред дест дена и бара уште 20 цистерни да бидат репарирани до 15 август, годинава.
Убавка Јаневска