Македонија одобри дополнителна екстрадиција на грчкиот фудбалски бос Псомијадис!

Македонските судски власти го прифатија барањето на Грција, и дозволија дополнително да му се суди за други кривични дела на фудбалскиот бос Макис Псомијадис, а не само за тоа што бил екстрадиран од Македонија.

Кривичниот суд во Скопје, донел одлука со која дозволил таканаречена  „дополнителна екстрадиција“ за Макис Псомијадис, фудбалски магнат од Грција, кој беше уапсен во Македонија, а потоа екстрадиран во Грција.

Во декември 2012 година Грција побарала дозвола од Македонија да отвори нова истрага во Атина за Макис Псомијадис (познат по прекарот Биг Мек) и да биде префрлен во затвор на издржување на казна затвор на која бил осуден во отсуство додека се криел во Македонија.

Томос Kрисос Псомијадис-Макис (56 години), грчката полиција преку Интерпол го барала за перење пари и за местење на фудбалски натпревари. Грчките судски власти тврдеа дека Псомијадис е организатор и водач на група кој уценувала и мамела играчи и фудбалски судии и на тој начин нелегално заработувале милиони евра.

Псомијадис бил претседател на фудбалскиот клуб „Кавала“ и со помош на повеќе луѓе потплатувал играчи, судии и агенти кои го местење резултатот, а во негово име се обложувале во спортски обложувалници во Грција и во странство.

Грчките правосудни власти тврдеа дека групата околу Псомијадис извршиле повеќе кривични дела: перење пари, измама, подмитување, корупција и закани.  Доколку биде прогласен за виновен на Макис Псомијадис според грчките закони му се заканува казна затвор до 70 години. Псомијадис преку неговата приватна фирма и должел на Грција три милиони евра данок кои не ги уплатил во периодот од 2004 до 2007 година.

Псомијадис, или „Биг Мек“ и „кралот на наместените натпревари“ како што го опишуваа грчките медиуми, бил уапсен во Грција, но со кауција од 600 илјади евра излегол на слобода по што станал недостапен за грчкиот суд.

Бегајќи од грчките судски власти, Псомијадис се засолнил во Скопје, а македонската полиција го уапси во кафуле во центарот на градот. Тој влегол илегално во Македонија и живеел во изнајмен стан.

Псомијадис беше уапсен на 9 ноември 2011 година во Македонија, пет месеци беше во истражниот затвор во Скопје, а екстрадицијата во Грција беше завршена во април 2012 година.

Осум месеци подоцна на 20.12.2012 година, грчкото министерство за правда побарало од македонските власти да одобрат дополнителна екстрадиција, за да можат да спроведат нова истрага против него и да го однесат на издржување на казна затвор според пресуда која била донесена во отсуство додека Псомијадис бил во бегство во Македонија.

-Тројца судии од одделот за борба против организиран криминал на Кривичниот суд во Скопје на 6 март 2013 година донесоа одлука да се одобри водење на нови постапки против Макис Псомијадис во Грција, и тоа: истрага за кривично дело перење пари и за признавање на судска одлука-, ни изјавија од прес канцеларијата на Кривичниот суд во Скопје.

Решението кое го донел судот, било испратено во Грција, каде што треба да му биде доставено на Псомијадис кој се наоѓа во затвор во Атина. Откако ќе биде доставен одговор дека е примено одобрувањето да се водат нови судски постапки против него, тој има право на жалба, а по конечноста, македонскиот министер за правда го потпишува финалниот документ.

-Министерството за правда ги испрати документите на судот до грчките власти во Атина. Кога ќе биде конечно решението, министерот за правда на Македонија Блерим Беџети ќе ја потпише бараната дополнителна екстрадиција. Нема правни пречки да не биде сторено тоа- вели Мирјана  Илиева, портпарол на Министерството за правда.

Меѓународните закони забрануваат на лице кое било екстрадирано од една земја во друга, дополнително да му се суди за други кривични дела доколку тие не биле наведени во барањето за екстрадиција.

По исклучок, земјата од каде што бил екстрадиран осомничениот може да се согласи и да дозволи дополнителни постапки, но само доколку во македонските закони, како во случајов, ги има кривичните дела за кои се бара спроведување на нови постапки.

Правните експерти укажуваат дека со ваква екстрадиција, 8 месеци откако лицето е екстрадирано, Македонија ги повредува меѓународните конвенции и се соочува со тужба пред Меѓународниот суд за човекови права во Стразбур. Доколку Псомијадис се жали на повреда на неговите права, тоа би било упатено кон Македонија која одобрила негово дополнително судење.

-Ова е школски пример каде што не треба да се одобри дополнителна екстрадиција, 8 месеци по предавањето на бараното лице. На ваков начин, Македонија го „покрива“ работењето на грчките власти, кое не е во согласност со конвенциите- вели Гордан Калајџиев, професор на Правниот факултет во Скопје.

Извор од Министерството за правда, кој инсистираше на анонимност, посочува дека имало дилеми дали да се одобри дополнителната екстрадиција, по што било решено да се донесе таква одлука, за да не биде обвинета Македонија дека го спречува гонењето на човек обвинет за наместени фудбалски натпревари.

Сега, Псомијадис во Грција се соочува со нова истрага за проневера и перење пари, а треба да одлежи и 3 години и 4 месеци затвор поради даночно затајување, казна на која бил осуден додека се наоѓал во Македонија. Задолжен е да плати и парична казна. Делата за кои Грција бара дозвола да му суди ги извршил во периодот од 1.7.2001 до 10.01.2003 година. Пресудата била донесена за затаениот данок во периодот од 1.6.2004 до 1.7.2007 година.

Поради наместени фудбалски натпревари, грчките прволигашки фудбалски клубови „Кавала“ и „Волос“ во летото 2011 година беа исфрлени од професионалната лига на натпреварување.

Македонската полиција со силно полициско обезбедување го однесе Псомијадис до граничниот премин „Богородица“ од каде што го презеде грчката полиција.

Во Македонија, Псомијадис има ангажирано адвокатска канцеларија, која одби да разговара на оваа тема, бидејќи за тоа немале добиено согласност од самиот Псомијадис.

Саше Димовски