Крстески: Државниот архив е одбраната од нападите врз нашиот идентитет
10.11.2020
Директорот на Државниот архив, Емил Крстески, во интервју за српска „Политика“ изјавил дека институцијата која тој ја предводи е многу важна историска, научна и културна институција и еден од главните столбови на нашиот национален идентитет.
На прашањето колкаво е значењето на Државниот архив денес, особено ако го имаме предвид нападот врз идентитетот на македонскиот народ, Крстески потенцирал дека тоа претставува ризница на колективната меморија и националните вредности на македонскиот народ.
„Државниот архив е сведок на минатото и сегашноста, чии темели се, всушност, сведоци на нашата национална свест. Тоа е почетна точка во истражувањето на генезата и историскиот развој на македонската нација, македонскиот јазик, историја, традиција и култура, како најважни елементи на идентитетот на една нација, и исто така е важен за нашата меѓународна афирмација и „одбрана“ од како што споменавте, нападот врз нашиот идентитет. На пример, имаме документација од Кабинетот на претседателот и Секретаријатот за европски прашања во врска со официјалното признавање на македонскиот јазик од страна на Обединетите Нации и Европската Унија“, изјави Крстески.
