Една жена е повредена денеска во центарот на Атина при инцидент до кој дојде кога грчката полиција употребила солзавец за да ги растера демонстрантите кои протестираат против можните отпуштања во државното образование, jави 24 Вести.

Во протестите учествуваат училишните чувари, наставници и хигиеничари, кои се противат на евентуалните отпуштања пред истекот на нивниот осуммесечен рок на принуден одмор.

Некои од демонстрантите се обиделе да упаднат во зградата на Министерството за административна реформа.

Полицијата привела 15 лица, од кои еден е член на синдикатот на вработените во образованието.

На околу 2.300 училишни чувари им се укинати работните места и се испратени на принуден одмор заедно со поголем број државни службеници, на кои им беше намалена платата за период од осум месеци.

Министерството соопшти дека 526 од нив ќе бидат прераспоредени во државниот сектор, за да го покријат недостигот од персонал во државните болници, додека останатите веројатно ќе бидат отпуштени.

.

Синдикатот на медиумите на Црна Гора денеска организираше протест пред црногорската влада во Подгорица поради бројни нерасветлени напади врз новинарите.

Демонстрантите симболично носеа самолеплива лента на устите.

Претставничката на Синдикатот Душка Пејовиќ изјави дека демонстрантите бараат од владата да ги поддржи измените во Кривичниот закон, да обезбеди дополнителна заштита на новинарите и да создаде услови за работа на Комисијата за истрага на нерасветлените напади врз новинарите.

Црногорските весници „Дан“ и „Вијести“ денеска излегоа со празни трети страници во знак на протест против насилството врз новинарите во таа земја.

По серијата се уште неразјаснети напади врз новинари од двата весника, неодамна пред редакцијата на „Вијести“ беше фрлена експлозивна направа, а во Никшиќ беше претепана дописничката на „Дан“ Лидија Никчевиќ.

Управниот совет на Здружението на новинари на Црна Гора деновиве побара одржување генерален штрајк во знак на протест против насилството и поткопувањето на новинарските и човековите слободи.