Просечен корисник секој ден поминува 4,8 часа на телефон, раст од 30% за само 2 години (инфографик)

Традиционалниот годишен извештај за состојбата на мобилниот екосистем и апликации, изработен од аналитичарите на App Annie, покажува дека денес светската економија, барем онаа фокусирана на дигиталните технологии, е повеќе ориентирана од кога било на мобилни телефони и мобилни апликации. Во текот на изминатата година, корисниците ширум светот поминаа повеќе време на своите мобилни телефони од кога било досега, продолжувајќи го трендот на брз раст поттикнат од пандемијата.

Според тоа, во 2021 година, просечниот корисник во светот секој ден поминувал 4,8 часа на својот мобилен телефон, што е раст од 30% за само две години. Можеби уште позвучно е фактот што корисниците, според тоа, посветуваат третина од своето време, во кое не спијат, на пишување и гледање во мобилен телефон.

Овој податок се однесува на десетте најголеми и најразвиени пазари кои App Annie ги следи. Корисниците во Бразил, Индонезија и Јужна Кореја во просек поминуваат повеќе од 5 часа на мобилни телефони, додека во Германија и Франција сè уште е нешто помалку од 4 часа. Раст, пак, е забележлив на речиси сите пазари.

Ваквата интензивна употреба на мобилни телефони донесе раст во финансиска смисла. Бројот на преземања на апликации порасна за 5% за една година, а корисниците симнаа 230 милијарди нови апликации минатата година. Тие потрошија 170 милијарди долари на тие сметки или 19% повеќе отколку во 2020 година. Порасна и пазарот за рекламирање во мобилни апликации, за 23%, и сега вреди 295 милијарди долари.

Зголемувањето на времето поминато со мобилни апликации доаѓа пред се од најголемите и највлијателните сервиси. Од секои десет минути поминати со мобилен телефон, седум се трошат на социјални мрежи, комуникации и фото/видео апликации. Најголем раст минатата година забележаа YouTube и неизбежниот TikTok, чиј раст е генериран најмногу од помладата (Gen Z) генерација корисници.

Трендот на раст го следи и мобилните игри за кои лани се потрошени 116 милијарди долари.

Најмногу преземања во светот забележа TikTok, а потоа Instagram, Facebook и WhatsApp. Освен нив, на топ листата влезе и Telegram, на високото 5-то место. Ако ги погледнете трошоците на потрошувачите во финансиска смисла, TikTok е во водство, а потоа следат YouTube, Tinder и Disney +.

Неприкосновен владетел по бројот на месечни активни корисници и натаму е Facebook, чии четири апликации се на врвот на оваа скала (Facebook, WhatsApp, Messenger и Instagram).

Зад нив се Amazon, TikTok, Telegram, Twitter, Spotify и Netflix.