Гордоста на поранешната држава, хотел „Југославија“ во Белград заминува во историјата, денеска треба да започне неговото уривање

Новиот сопственик планира да го сруши целиот хотел, а единствено што ќе остане е огромниот лустер кој пред десет години влезе во Гинисовата книга на рекорди како најголем лустер во светот.
Беше симбол на Југославија, а сега ќе ја доживее истата судбина како поранешната држава.

Денеска во Белград треба да започне уривањето на познатиот хотел Југославија, поранешен симбол на луксузот и престижот кој беше домаќин на многу светски лидери и филмски ѕвезди како кралицата Елизабета Втора, Ричард Никсон и Елизабет Тејлор.

За продажбата на хотелот се пишуваше во март годинава, а потоа беше објавено дека MV Investment d.o.o го купила од Danube Riverside. од Белград во сопственост на Милениум Тим за 27 милиони евра. Вкупната вредност на имотот што го презеде МВ Инвестмент, единствениот учесник на наддавањето, беше проценета на нешто повеќе од 55 милиони евра.

– Со почетна инвестиција од 42 милиони евра го завршивме преземањето на целата локација на поранешен хотел Југославија. Инициравме измена и дополнување на Деталниот регулационен план за да може да се реализира изградба на модерен станбено деловен комплекс со хотел од висока класа на локација која апсолутно тоа го заслужува – соопштија пред неколку месеци тимот на Милениум и додаде дека вкупната планирана инвестиција во тој проект ќе изнесува повеќе од 400 милиони евра.

Новиот сопственик планира да го сруши целиот хотел, а единствено нешто што ќе го задржи е огромниот лустер кој пред десет години влезе во Гинисовата книга на рекорди како најголем лустер на светот. Лустерот е тежок 14 тони, долг е 20 метри, има 5.000 светилки и 40.000 кристали Сваровски.

Новиот хотел ќе има две високи згради, од кои едната ќе биде станбена, а другата комерцијална. Хотелот ќе има 5 ѕвезди и капацитет од 200 соби, што е двојно помалку од сега. Секоја соба ќе има минимум 38 квадратни метри.
Инаку, хотел Југославија бил изграден во 1969 година и бил еден од најголемите и најлуксузните во земјата. Архитектурата на хотел Југославија ја одразуваше величественоста и амбициите на тогашниот социјалистички режим. Дизајниран во модернистички стил, хотелот комбинира функционалност и луксуз, со пространи ходници, големи салони за бал и елегантни ресторани. Неговата локација покрај Дунав нуди поглед на реката и Калемегдан, најпознатата тврдина во Белград.

Според една од приказните, изградбата на хотелот ја наредил тогашниот претседател на СФРЈ, Јосип Броз Тито, на кого Хаиле Селасие, лидерот на Етиопија, наводно, при неговата посета на Југославија во 1961 година се пожалил дека Белград е голем и убав град, но дека нема ниту еден престижен хотел. Тоа наводно било доволно Тито да нареди изградба на хотел Југославија. Меѓутоа, друга верзија на приказната е дека Тито наредил изградба на хотелот уште во 1947 година, пишува vecernji.hr.

Дума.мк