Ден на еколошкиот долг – Од утре живееме на кредит на сметка на природата!
Светскиот Ден на еколошкиот долг годинава се одбележува на 2 август, а Северна Македонија влезе во долг веќе на 7 јуни
ЗАГРЕБ – Годинава, Денот на еколошкиот долг се одбележува на 2 август. Овој ден го означува датумот кога нашата годишна побарувачка и потрошувачка на природни ресурси го надминуваат сето она што Земјата може да го произведе или обнови за една цела година. Ова се случува затоа што испуштаме повеќе јаглерод диоксид во атмосферата отколку што можат да апсорбираат нашите океани и шуми, ги исцрпуваме резервите на риби побрзо отколку што може да се обноват и ги сечеме шумите пред да можат повторно да израснат. Последиците се екстремно високи топлотни бранови, незапирливи шумски пожари, разорни поплави и драматични суши, кои сѐ почесто се случуваат ширум светот.
Глобалната мрежа Global Footprint Network го пресметува Денот на еколошкиот долг секоја година користејќи податоци за националниот отпечаток и биокапацитетот. Иако на 2 август се одбележува глобалниот Ден на еколошкиот долг, во нашиот регион тој дојде многу порано. Прво во Словенија на 18 април, потоа во Црна Гора на 13 мај, во Хрватска и БиХ на 29 мај, Северна Македонија на 7 јуни, во Србија на 8 јули, а во Албанија ќе биде на 3 ноември. Во регионот очигледно живееме на кредит, лишувајќи ги идните генерации од природата.
„За помалку од осум месеци човештвото ги потроши ресурсите што ни ги обезбеди Земјата за цела година. Во последните пет години трендот малку се смири, но тешко е да се каже во која мера тоа се должи на забавувањето на економијата, а колку од тоа е резултат на напорите за декарбонизација. Сепак, поместувањето на Денот на еколошкиот долг оди премногу бавно. За да се постигне целта на на Меѓувладиниот панел на ОН за климатски промени (IPCCR) за намалување на глобалните емисии на јаглерод за 43% до 2030 година (во споредба со 2019 година), ќе биде неопходно да се поместува Денот на еколошкиот долг за 19 дена секоја година во следните седум години“, посочува Петра Боиќ Петрач од WWF Adria.
Постојат решенија за намалување на еколошкото надминување и зајакнување на биолошката обнова, што може значително да го помести Денот на еколошкиот долг напред. Платформата Power of Possibility https://www.overshootday.org/power-of-possibility прикажува бројни технологии, владини стратегии, јавни политики и најдобри практики од граѓанските иницијативи и академската заедница. Така, глобалното зголемување на нискојаглеродните извори на електрична енергија од сегашните 39% на 75% би го поместило овој ден за 26 дена, со намалување на отпадот од храна за 50% би добиле 13 дена, а со планирано садење дрвја, дополнителни 2,1 ден.
„Овој ден е уште еден потсетник за тоа дека претерано ги искористуваме природните ресурси, што доведува до сè позабрзан еколошки и климатски колапс на Земјата. Ова не само што е неодговорно, туку е и крајно опасно и бара итни мерки. Светските лидери мора да се потпрат и на својата политичка моќ за да ја третираат постојната еколошка ситуација како итна и да го отворат патот за одржлива иднина. Неодамна донесениот Закон за обновување на природата е вистинскиот пат, но сега се чека тој да се финализира и неговата примена да стане задолжителна. Сите ние сме одговорни да земеме предвид колку е важно да се заштити природата и да ги поддржиме оние на кои имплементацијата на овој закон е приоритет без алтернатива“, заклучува Боиќ Петрач.
WWF е една од најголемите и најпочитуваните независни организации за заштита на природата во светот, со речиси пет милиони поддржувачи и глобална мрежа која е активна во повеќе од сто земји. Мисијата на WWF е да го запре влошувањето на природната средина на Земјата и да изгради иднина во која луѓето ќе живеат во хармонија со природата преку зачувување на биолошката разновидност во светот и преку осигурување на одржливост на употребата на обновливите природни ресурси, со промовирање на намалувањето на загадувањето и расипничката потрошувачка. За дополнителни информации: https://www.wwfadria.org/hr
ПР текст
Дума.мк