Контраспин: Кој е агресор и кој води хибридна војна во Украина?

На Самитот на групата најразвиени земји Г20 во Бали, министерот за надворешни работи Сергеј Лавров одржа прес конференција, на која изнесе позната пропагандистичка реторика, која досега била повеќепати повторувана, но, пред сè, неговиот наратив содржеше голем број спинови во однос на преговорите меѓу Русија и Украина, за тоа кој, всушност, ја почнал хибридната војна во Украина како и за санкциите против Русија од страна на државите

Пишува: Весна Коловска

Рускиот министер за надворешни работи, Сергеј Лавров на Самитот на групата најразвиени земји Г20 во Бали, одржа прес конференција, на која изнесе позната реторика со пласирање на спинови, полувистини, но и дезинформации. Лавров изјави дека хибридната војна во Украина ја почнал Западот, кој ја подготвувал со години. Според него, има разногласие во поглед на осудата на Русија во декларацијата од Самитот. Во однос на евентуалните преговори со Украина, шефот на руската дипломатија кажа дека Украина е таа што забрани преговори со Руската Федерација, а не претседателот, мислејќи на рускиот, Владимир Путин.

На прес-конференцијата Лавров изнесе повеќе спинови.

Спин: Украина забрани преговори со Руската Федерација. Претседателот (Владимир Пуин н.з.) не одбива преговори. Украина е таа што одбива преговори. И колку повеќе чекаме, толку повеќе ќе биде тешко да се договориме. 

[Извор: Прес конференција на Сергеј Лавров на Самитот Г20 во Бали, датум: 15.11.2022 година]

Контраспин: Украина не забрани преговори со Руската Федерација, туку одбива да преговара со претседателот Владимир Путин. Во Одлуката на Советот за национална безбедност и одбрана на Украина од 30 септември 2022 година, пишува:

Во однос на акциите на Украина како одговор на обидот на Руската Федерација за анексија на територијата на нашата држава, со цел да се гарантира безбедноста на евроатлантскиот простор, Украина, и да се врати нејзиниот територијален интегритет, одлуката е да се ​​констатира неможност за водење преговори со претседателот на Руската Федерација, В.Путин.

Одлуката следеше по анексијата на Путин на четири дополнителни украински региони на исток и на југ, како и по редовните воздушни напади врз Киев и врз други градови. Украинскиот претседател Володимир Зеленски по објавата на декретот во видео обраќањето рече:

Ќе преговараме со новиот претседател.

Украинскиот претседател сугерираше дека е отворен за мировни преговори со Русија, омекнувајќи го неговото одбивање да преговара со Москва сè додека претседателот Владимир Путин е на власт. Украинската власт никогаш не исклучила преговори со Русија, туку со актуелниот претседател Путин. Ова дополнително го објасни и советникот на Зеленски, Михаило Подољак, кој одговори на шпекулациите дека САД ја притиска Украина да седне на преговарачка маса.

Украина никогаш не одби да преговара. Нашата преговарачка позиција е позната и отворена, напиша тој на Твитер, велејќи дека Русија прво треба да ги повлече своите трупи од Украина.

Во истиот твит, тој вели дека се конструктивни во нивната проценка и дека ќе разговарааат со следниот лидер (н.з. на Русија).

Спин: Европската унија и НАТО одамна се хибридни учесници во хибриден конфликт, хибридна војна во Украина.

Контраспин: Во Украина од 24 февруари 2022 година се води современа конвенционална војна од копно, вода и воздух, во која, според проценките на американскиот генерал Марк Мајли, до сега загинаа околу 40.000 украински цивили, украински војници, но и 100.000 руски војници. Во дефинициите, хибридното војување е вид непријателска акција во која напаѓачката страна ја маскира својата агресија преку условно тајни операции на специјалните служби и специјалните сили, сајбер напади, прилично отворена поддршка на опозицијата и бунтовниците на непријателска територија, проследени, во последната фаза, со вклучување на сопствените вооружени сили. Утрото на 24 февруари, Русија официјално започна „специјална воена операција“ против Украина, со цел, како што објасни Путин, да ја „демилитаризира“ соседната држава.

Целта на операцијата е да се заштити народот на Доњецката и Луганската народна република (ДПР и ЛПР), рече тој.

Освојувањето на делови од Украина Русија го почна во 2014 година со анектирањето на Крим.

Европската Унија и НАТО ја осудија воената инвазија во Украина од страна на Русија. Земјите членки на ЕУ одговорија со изолација на Русија, поддршка на Украина и поставија цел да се намалат последиците од војната. Според „Еуроактив“, се подготвува нов сет принципи во односите со Москва.

Русија, користејќи храна како оружје во војната против Украина, е единствената одговорна за глобалната криза со безбедноста на храната што ја предизвика, се вели во нацрт-текстот.

Нацртот, исто така, ги повика земјите-членки „тесно да соработуваат со партнерите ширум светот и со сојузниците во НАТО за да го одбранат и зајакнат меѓународниот поредок заснован на правила“.

Шефот на руската дипломатија, одговорајќи на новинарско прашање, го обвини Западот како што рече, за политизирање на Самиот Г20, а вината за економската криза и воените дејствија ги прикажа како поделена одговорност на двете страни.

Спин: Нашите западни колеги се обидоа на секој можен начин да ја политизираат оваа декларација и се обидоа да се прикрадат во формулацијата што би имплицирала осуда на дејствијата на Русија во име на целата Г20, вклучително и нас самите.

Контраспин: Во предлог завршната декларација, за која преговарачите на 19 држави од Г20 и ЕУ постигнаа договор на првиот ден од Самитот, се вели:

Повеќето членки најостро ја осудуваат војната во Украина и нагласуваат дека таа предизвикува огромно човечко страдање. Имаше други ставови и различни оценки за ситуацијата и санкциите, се вели во нацрт-декларацијата, која ја потврди и европски дипломат, објави агенцијата Ројтерс.

На самитот се упати и на резолуцијата на ОН донесена на почетокот на март, во која има осуда за војната. Тогаш за осуда гласаа 141 од 193 членки на ОН. 40 земји беа против или воздржани, меѓу нив освен Русија и Кина, уште и Индија и Јужноафриканската Република, кои се членки на Г20.

Употребата на зборовите „повеќето членки“ е знак на поделба, како и признанието дека „има поинакви погледи и различни проценки“, како и зборовите дека Г20 „не е форум за разрешување на безбедносни прашања“.

Но, и покрај тоа, употребата на зборовите од мартовската резолуција на Обединетите нации во која се напаѓа „на најсилен можен начин агресијата на Руската Федерација против Украина“ и се бара “нејзино целосно и безусловно повлекување“ од територијата на Украина, што претставуваше „голем успех“ според Џон Китон, директорот на Истражувачката група Г20.

Овде Г20 не остава сомневање за тоа кој ја започна војната и како таа треба да заврши, вели тој во интервју за Еј-Би-Си, додавајќи дека се забележува „активна промена“ кај Кина и Индија, кои се приклучија кон „демократската страна на големите геополитички поделби“.

Овој напис е изработен во рамките проектот Промовирање на пристап до веродостојни вести за борба против дезинформации, имплементиран од Фондацијата Метаморфозис. Написот, кој е првично објавен во Вистиномер, e овозможен со поддршка на американската непрофитна фондација NED (National Endowment for Democracy). Содржината на написот е одговорност на авторот и не секогаш ги одразува ставовите на Метаморфозис, НЕД или нивните партнери.