Нејасно видео шири дезинформации дека вакцините против ковид-19 содржат графен оксид

Видеото е нејасно и нема информации кога и каде е направена снимката, за кој пациент станува збор. Нема никакви факти кои би го поткрепиле тврдењето дека лицето чиишто бели дробови се на снимката е вакцинирано против ковид-19 и дека се најдени траги од графен оксид. Вакцините против ковид-19 не содржат графен оксид, составот на вакцините е јавно објавен на официјалните веб-страници на нивните производители, а истиот во форма на документи го има и на страницата ковид19вакцинација.мк

Пост на Фејсбук неосновано тврди дека вакцините против ковид-19 содржат графен оксид. Постот е придружен со видео за кое се тврди дека прикажува снимка на бели дробови од лице вакцинирано против ковид, а во кои е најдено присуство на графен оксид.

Ужас… Графен оксид во белите дробови на „вакциниран“ човек со наводните „вакцини“ против наводниот корона вирус – ковид-19“, се вели во постот што го анализираме.

Видеото под постот на кое наводно се гледа снимка бели дробови е нејасно, односно нема информации кога и каде е направена снимката и за кој пациент станува збор. Нема никакви факти кои би го поткрепиле тврдењето дека лицето чиишто бели дробови се на снимката е вакцинирано против ковид-19 и дека се најдени траги од графен оксид. На снимката само можат да се слушнат нејасни гласови на руски јазик.

Во последно време, фокусот на дезинформации, од болеста и реакциите од вакцините, се премести на составот на вакцините и нивните перформанси. „Вистиномер“ досега неколкупати дебанкираше вести кои тврдат дека во составот на вакцините против ковид-19 има графен оксид.

Вакцините против ковид-19 не содржат графен оксид, а тоа може едноставно да се провери доколку се погледне составот на вакцините кој е јавно објавен на официјалните веб-страници на нивните производители, а истиот во форма на документи го има и на страницата ковид19вакцинација.мк. Како што може да се види, графен оксид никако не е дел од составот на вакцините.

Обвинувањата за графен оксид во составот на вакцините главно се насочени кон производителот „Фајзер“ од каде и официјално се огласија и ги демантираа ваквите наводи.

Претставник на „Фајзер“ за „Асошиејтед прес“ ијзавил дека во нивната вакцина нема графен оксид. „Вистиномер“ веќе пишуваше дека студијата со која се прави обид да се „поткрепи“ тврдењето дека во Фајзеровата вакцина има графен оксид, не е прегледана од медицинската заедница (не е peer-reviewed), ниту, пак, е поддржана од Универзитетот во Шпанија, Алмерија.

Кит Лонгли, менаџер за наука во „Фајзер,“ за „Асошиејтед прес“ изјавил дека оваа состојка во нивната вакцина не постои. Истото го потврдиле и хемиски и медицински експерти, кои не се поврзани со компанијата „Фајзер“.

Не е во листата на состојки, и нема никаква можност да биде присутна во вакцината, изјавил Ален Мајерсон, професор по хемиски инженеринг во Институтот за технологија од Масачусетс.

Експертот за вакцини, Пол Офит, од детската болница во Филаделфија, додал дека ова тврдење (дека вакцините содржат графен оксид) е чиста глупост.

КОРОНАВИРУСОТ Е РЕАЛНОСТ

Понатаму, постот шири дезинформации дека ковид-19 не постои, односно вели „наводниот“ коронавирус. И ова тврдење не е точно. За жал, коронавирусот е реалност која досега одзеде милиони животи.

Коронавирусот е изолиран во лабораторија, со што се докажува неговото постоење. Вирусот беше идентификуван од кинеските власти на 7 јануари 2020 година, по што неговиот генетски материјал РНК, беше изолиран. Самата Светска здравствена организација (СЗО) потврдува  дека вирусот е изолиран на 7 јануари 2020 година и во следното известување. Ова изолирање на коронавирусот содржи инструкции за создавање на вирусните протеини, кои се основа за вакцините на „Фајзер“ и „Модерна“.

Последните статистики на Институтот за јавно здравје во Република Северна Македонија, покажуваат дека досега во земјата се направени вкупно 1.396.992 тестирања на ковид-19. Вкупната бројка на ковид-19 дијагностицирани лица во нашата земја од почетокот на епидемијата изнесува 204.416, бројот на оздравени пациенти е 189.947, на починати е 7.194, а бројот на активни случаи изнесува 7.275 (состојба за 04.11.2021). Сите овие бројки не се само статистика, туку вистински луѓе. Неможно е да се манипулира со толкав број на заразени доколку ковид не постои.

Од сето ова можеме да заклучиме дека постот што го анализираме шири дезинформации дека короанвирусот не постои и дека вакцините против ковид-19 содржат графен оксид. Токму затоа и го оценуваме како невистинит.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар