Дваесет крводарители од Чашка даруваа крв

Триесет и шест годишниот Влатко Стојановски од населбата Чашка денеска по 41 пат даруваше крв на крводарителската акција организирана по повод денот на општината. Тој беше еден од дваесетмината жители на населбата кој ја подаде својата рака со цел да спаси нечиј живот.

-Постојано се одзивам на повиците за дарување крв. Бројката на дарувања самата за себе говори. Хуманоста треба да биде наша граѓанска должност. Се надевам и пример за многумина, рече Стојановски.

Денеска кога Општина Чашка ја одбележуваше 23 годишнина крводарителската акција се реализираше во една од училниците на ООУ „Тодор Јанев“. И дел од наставниците беа крводарители. Екипата на Трансфузиологија беше задоволна од одзивот до 12 часот кога имаше веќе 15 крводарители.

Претседателот на Општинската организација на Црвен Крст Чашка, Роберт Новевски е задоволен од досега спроведените крводарителски акции

– По две до три крводарителски акции се организираат на годишно ниво во Чашка и на нив вообичаено се одзиваат помеѓу 25 и 35 крводарители. Ние сме задоволни и им благодариме на граѓаните кои и денеска се одзваа, дојдоа и даруваа крв, рече Новевски.

Од дваесетмината кои денеска даруваа крв седумнаесет се мажи и три жени./У.Ј