Јубилеј: Три децении на Командата за обука и доктрини во велешката касарна (фото)

Триесет годишнината од формирањето на Командата на обука и доктрини, беше одбележана денеска во касарната „Алексо Демниевски Бауман“ во Велес. На 14 април, 1992 година во гарнизонот во Охрид бил пристигнат првиот регрут  припадник на Армијата, велешанецот Панче Јамандиев, додека на 15 април, во касарните на Армијата пристигнала и првата класа на регрути од регрутниот состав. Министерката за одбрана, Славјанка Петровска, им го честиташе денот на сите старешени, питомци и војници, коишто се дел од оваа единица велејќи дека преставуваат значајна алка во синџирот за одржување на борбената подготовеност на македонската армија и за развојот на вештините и можностите на секој нејзин припадник.

-Нашата цел е да овозможиме стабилна и развојна кариера, постојана едукација и доусовршување, обуки и вежби за секој припадник бидејќи за нас човечкиот потенцијал е најголемото богатство. Мотивацијата и посветеноста на секој војник се клучни за успешна одбрана. Вратите се отворени, намерата е јасна, создавање на вистински НАТО офицери, подофицери и професионални војници. Сите НАТО одлуки се достапни за припадниците на нашата армија, ги интерзивираме заедничките вежбовни активности дома и кај сојузниците. Со членството во НАТО целосно ги отворивме вратите и можностите за доедукација и усовршување, обуките за земјите на НАТО се обуки достапни и за нас, вежбите на алијансата се отворени и за нашата НАТО армија. Со се ова го зајакнуваме достоинството на луѓето во униформа, ја зајакнуваме  нивната позиција во општеството и највисокиот углед и доверба којашто ја уживаат кај граѓаните. Во оваа прилика ќе се осврнам на полигонот Криволак, капацитет на РСМ но и капацитет на НАТО. Затоа на овој полигон континурано подобруваме инфраструктура и воспоставуваме нови содржини. Развојот на полигонот Криволак вклучува модернизација, обнова и изградба на полигони, опремување и значајно подобрување на постојната инфраструктура со што посебно ќе се додадат можности за обука и спроведување на вежби, додаде Петровска.

На свеченоста Заменик командантот на Командата за обука и доктрини, полковник Стојанче Тодоров, рече дека Командата за обука и доктрини е задолжена за едукација, развој, градење на капацитети како и вградување на научените лекции и на добрите практики во функционирањето на единиците на Генерал штабот.

– До денес низ програмите за обука, покрај регрутите од 1992 до 2006 година, поминаа и се обучуваа 39 генерации на граѓани на доброволно служење на воен рок а многу од нив ја завршија основната борбена обука за професионални војници и денес се составен дел од активниот состав на армијата. Во командата за обука и доктрини успешно се развиваат и спроведуваат курсеви за основна и напредна  индивидуална обука на професионалните војници како и курсевите за континуирана едукација и развој на подофицерскиот Код на армијата. Во центарот за обука на питомци се врши и реализација на воена обука на идните офицери на Армијата а исто така се едуцираат и претставници од нашите пријателски земји Босна и Херцеговина, Косово и Црна Гора. Центарот за странски јазици, центарот за одгледување и дресура на кучиња , центарот за стимулации во континуитет лично подготвуваат по стотина припадници на армијата за постигнување на подобри резултати во работата во согласност со прифатените НАТО стандардизациски договори кои побаруваат стандардизиран квалитет со  согласно јасно пропишани и мерливи норми, додаде Тодоров.

Според  началникот  на Генерал Штаб,  Генерал потполковник Васко Ѓурчиновски, во изминатите триесет години биле постигнати многу резултати.

-Ваш сограѓанин Панче Јамандиев е првиот регрут, македонски војник, кој пристапи во нашата Армија, впрочем и на овој ден пред триесет години не само во овој гарнизон туку и ширум републиката во неколку други, формално правно започна да функционира армијата.  Во изминативе триесет години постигнавме многу, меѓутоа продолжуваме по традициите кои се континуитет од втората светска војна, од народо осободителната војна каде што впрочем и вие како припадници на овој гарнизон ги негувате традициите од голем херој, Алексо Демниевски – Бауман. Бидете горди на него.  Но и сите ние граѓаните на оваа земја  ќе продолжиме да ги негуваме традициите на сите останати наши живи херои кои се вградија во развојот на нашата армија. Едукацијата и образованието на младите кадри е тежишната на мисијата на Командата за обука и доктрина, питомците на Воената академија се нашата иднина но и младите регрути војници кои го поминуваат првиот војнички временски период во вашата касарна, додаде Ѓурчиновски.

На свеченоста беа доделени стимулативни мерки, благодарници, за поранешните команданти на Командата за обука и доктрини како и дипломи за екипите победници во спортски натпревари по дисциплини. Исто така, беа доделени и награди за најдобри ликовни творби и најдобри поеми на ученици по објавен конкурс од страна на велешкиот гарнизон.

Велешанецот Панче Јамандиев во разговор со Министерката за одбрана и Началникот на Генерал штабот на АРСМ, истакна дека е горд на својот успех од пред триесет години и дека почетоците секогаш ќе останат во негово сеќавање.

Стефани Манева

фото: