Почина легендарниот колекционер на олдтајмери, професор Дионис Пашлаков
16.11.2020
На 71 годишна возраст, по кратко боледување од леукемија, синоќа почина Дионис Пашлаков, пасионираниот колекционер на стари автомобили и пензиониран професор по биологија од Неготино.
Веста за неговата смрт ја објавија негови роднини на социјалните мрежи, а неготинчани со голема тага и неверување ја примија веста и веќе се простуваат со омилениот професор на многу генерации, кој цел живот го посвети и живееше за своите олдтајмери. Пред неколку години тој отвори и Музеј за олдтајмери.
Дионис Пашлаков цел свој живот беше професор по биологија во неготинската гимназија, а паралелно го работеше и развиваше своето хоби.
За овој пасиониран колекционер на стари возила и за неговото хоби, живот и сон, беше снимен и документарниот филм „Avec l’amour“ (,,Со љубов”) кој го режираше неговиот поранешен ученик Илија Цветковски, по сценарио на наградуваниот документарист Атанас Георгиев.
Овој документарец пред три години го отвори фестивалот МакеДокс во скопски Куршумли ан, и предизвика голем интерес кај широката домашна, но и светска јавност. Документарецот ја прикажува страста кон олдтајмерите на професорот Дионис Пашлаков, неговото семејство, како и сонот да отвори Музеј за олдтајмери во Неготино, кој ќе стане светска атракција. Во самиот филм опфатен е и моментот како учениците на кој им е класен раководител, му подаруваат олдтајмер кола „Буба“, а по повод пензионирањето на својот професор.
Граѓаните на општина Неготино ќе го паметат својот сограѓанин професорот Дионис Пашлаков, како одличен професор кој едуцирал многу генерации, но најмногу ќе го паметат по својата пасија. Неговите дела вечно ќе живеат и веќе се овековечени во Музејот на олдтајмери, лоциран во Неготино, единствен од ваков тип во нашата држава.
Mите Јаначков