Икмет: Се борам со сиромашниот живот и не знам дека постоел ден на ромите
Семејството Усеинови е деветчлено а живее со 9 илјади денари. Толку пензија зема Икмет и ги издржува сопругата, двете керки, помага и на синот и неговите четири деца. Тој незнае за денешниот ден на ромите, неговото семејство досега не го посетила ниту една невладина ромска организација. Овој седумдесет и шест годишен велешанец вели дека за друго не се интересира освен како да најде решение за покривот на трошната куќарка кој прокиснува, за земјениот под во двете собички, за лебот кој не може во месецот да го обезбеди, за болестите и лековите кои не е во можност да ги купи.
– Никој не дошол кај мене дома. Незнам за каков ден ми зборувате. Јас си имам маки како двете керки негде да најдат вработување, како да се прехраниме ако не е продавницата во која на тефтер ми даваат леб кога ке снемаме пари, како да си ги купам лековите. Внучиња имам, овие кои се со мене бараат нешто да им купам. Тие барем имаат манџа од кујната, државата тоа им го даде ама бараат за тетратка, за пенкало, за обувки и јакни а јас немам за тоа. Тие седум илјади што им ги дава државата се трошат за неколку дена и потоа пак се кај дедо, рече Икмет.
Тој ни раскажа како едвај успеал да го плати на рати долгот за вода, за кој бил тужен. Сега очекува нова тужба и извршител да му влезе дома. Потоа ќе биде истата песна, секој месец по 2 илјади за водата, па сметките за струја ке треба да се платат а Икмет ќе нема од што да си купи лекови.
– Една година едвај исплатив 24 илјади денари за вода со се каматите кои ме изедоа. Незнам веќе од што се не боледувам. Имав мозочен излив и еве едвај одам ама пари за лекови немам. Кога ќе размислам ајде јас сум стар човек, со една нога во гроб ама како ке ги биде овие мои деца без мојата пензија. Барем еден од нив да се вработеше, па да не доцниме со сметките за струја, за вода и леб да купуваме а да не се запишуваме, рече Икмет.
Семејството Усеинови го оставивме да живее со надеж дека можеби некој и на нив ќе се сети. Ке ги посети, сослуша и ќе им помогне да симнат мал дел од товарот што им го наметнал тешкиот живот.