Јагнињата на велешките сточари завршија на италијанскиот и хрватскиот пазар
Македонското јагне ќе се најде на трпезите во Италија и Хрватска. Таму веке се извезени над 6.500 јагниња од општините Велес, Градско и Чашка. Сточарите се задоволни од пласманот и остварената откупна цена. Кавадаречка компанија ги откупи сите јагниња од велешко по цена од 150 денари за килограм жива мера.
„ Задоволен сум и од цената и од пласманот. Имав 850 јагниња од кои за дамазлак оставив 400 , а другите ги продадов. На цел страв поради почетната ниска цена од 100 до 120 денари за килограм жива мера , од остварената 150 денари сум презадоволен. Инаку имам 900 овци. Од женските што ги оствавив и за кои ќе добијам субвенции ќе го зголемам стадото на 1.300 овци“, вели Љупчо Трајков, сточар од селото Теово.
И компанијата Милком задоволна од пласманот и постигнатата цена за јагнешкото. Од 600-тини овци колку што има, компанијата продаде над 350 јагниња. И најголемиот сопственик на овци во велешко ЗК „Вардар“ од Градско, на бизнисменот Минчо Јорданов, се презадоволни како од пласманот така и од постигнатата продажна цена од 150 денари за килограм жива мера. Комбинатот, од стадото од над 7.000 овци , кој се наоѓаат кај селата Убого, Грнчиште, Свеќани, преку компанијата „Стокопромет“ за пазарот во Хрватска извезе повеќе од 4.000 јагниња.
Инаку во велешко, во последниве години, сточарите повторно почнаа да ги зголемуваат стадата со овци и кози. Во овој регион, во кој некогаш имаше околу 300 илјади сега има нешто повеќе од 50 илјади овци. Најголемото намалување на овците во велешко се случи во последните три години кога накупци од ресенско и дебарско за 100 евра по овца ги откупуваа и ги продаваа во Албанија заработувајќи далеку повеќе пари. Само од селото Горно Јоболчиште, во кое некогаш имаше повеќе од 30.000, беа продадени повеќе од 24.000 овци./Д.С