Се полнат шлеперите со башиноселски млад кромид за извоз во Хрватска
Нареден во врзопи и складиран во гајби синоќа младиот кромид од нивите околу Башино село се товараше во шлепер. Работник на струмичка фирма, извозник, ја мереше количината која ја предаваа производителите и потоа гајбите се товараа во камионот. Тој вчера беше втор шлепер а третиот чекаше спроти плацот до базата за сепарација кај Башино село.
– Планиран е откуп на околу дваесет и четири шлепери со млад кромид од Башино село. Најголем дел од нив ќе завршат на Хрватскиот пазар. Другиот дел е планиран за Словенија, за Австрија и уште неколку други скандинавски земји. Оваа година се поклопи празнувањето на Велигденските празници кај нас и во Хрватска а тоа значи дека извезените количини нема да бидат како ланските туку помали, рече преставникот на фирмата извозник.
Башиноселци го предаваа годинешниот род. Чекаа во ред за да ги измерат гајбите со млад кромид и да ги товарат.
– За врзоп ни плакаат по 200 денари и тоа е добра цена бидејки домашните прекупци кои доаѓаат за да го земат нашиот кромид од селото и го продаваат на Кванташки пазар во Скопје ни нудат четири пати пониска цена. На крајот ќе мораме да им го дадеме нив. Оваа количина што ќе се извезе е само една третина од вкупно произведениот годинешен род во градините околу селото, рече производител.
Родот на башиноселци до четврток, кога започнуваат Велигденските празници, ке биде испратен за пазарот во Хрватска и уште неколку други земји. Се што потоа ќе никне во нивните градини ќе се пласира на домашниот пазар каде едно врзопче, со пет млади кромитчиња, има цена од 2,5 денари.