Дирекцијата за заштита и спасување изложи дел од опремата пред велешани
Во лето, кога се гаснат пожари и во рана пролет кога надојдените реки се излеваат од коритата интервенираат припадниците на тимовите за брза интервенција на Дирекцијата за заштита и спасување. Тогаш шестмината вработени заедно со граѓаните доброволци се задолжени да ја следат состојбата и да интервенираат.
Првите тоа го прават професионално додека на доброволна основа тогаш се повикуваат и припадниците на девет вода и две одделенија кои се подготвени во секој момент да интервенираат во заштитата и спасувањето на луѓе.
Денеска на меѓународниот ден на цивилната заштита, раководителот на подрачното одделение на Дирекцијата за заштита и спасување Билјана Симонова вели дека кадровски и технички се опремени со свои противпожарни авиони, возила за урбани и шумски пожари, за деминирање, за интервенирање во сите несреќи , елементарни непогоди или природни катастрофи кои можат да се случат.
– Дирекцијата , која е природен и правен наследник на цивилната заштита, во своето деветгодишно постоење успешно се справуваше со последиците од природните непогоди и други несреќи, заштитувајки ги луѓето и нивните имоти како и природните богатства, рече Симонова.
Дел од опремата за противпожарна заштита, за прва медицинска помош и за хемиски несреќи со кои располагаат тимовите за брзи несреќи на Дирекцијата денеска можеа да ја видат велешани . Таа беше изложена пред споменикот на Кочо Рацин кај велешката Гимназија.