Работеле месец и половина а газдата на погонот во Неготино не им дал пари
„ Болната колешка ни почина чекајќи да и ги исплатат парите а таа да си купи лекови“, започна да раскажува Александра Богданова за својата и маката на колешките кои три ипол месеци немоажт да ги добијат парите што ги заработиле во погонот за обработка на полжави во Неготино.
– Навистина ми е жал за колешката која со нас од Велес патуваше до Неготино и работеше а беше болна. Таа идеше за да заработи пари за лекови. Си почина и пари не дочека, рече Богданова.
Со неа пред судот во Велес дојдоа уште педесетина жени од групата која броела вкупно осумдесет. Сите тие лани, во ноември и првата половина од декември, работеле за фабриката за замрзната храна од Скопје во Неготино. Уште толку имало од Кавадарци и Неготино. Работеле месец и половина на пакување на полжави, на -13 степени за 350 денари дневница. Откако пратката заминала за Франција, работодавачот ги отпуштил,а пари не им дал. Секоја од нив има побарување наа 15 илјади денари.
– Работевме прва и втора смена, од прва доаѓавме на трета смена и секаде се обративме за на крајот да останеме без денар. Ништо не ни исплати газдата. Ни викаше ај на 15-ти, па на 1-ви и досега три месеци поминаа а беше договорено за ноември да ни исплати до 15 декември . Ама пари не ни даде. Помош баравме од сите институции и на крајот еве Ве побаравме Вас да ни помогнете, рекоа жените.
Тие со својот револт, се обидоа да предизвикаат внимание кај институциите,бидејќи сопственикот на фирмата во која работеле ги игнорира. До сега рекоа дека биле секаде . Со договорите за работа како доказ, биле и кај адвокат, но велат судските трошоци се прескапи за да ја истераат правдата на виделина. Речиси сите живеат во беда и сиромаштија, а во работата виделе искра надеж.
– Сите ние сме сиромашни, за парче леб отидовме да заработиме и да не ни ги дадат парите па нели е грев, рече Богданова.
Овие жени им дадоа рок од неколку дена на сопствениците на фирмата за кои тврдат дека се грчки- српски инвеститори, но и на иституциите за да ја исправат нанесената неправда. Ако не најавија дека ќе мораат да позајмат пари и да тужат. Од фирмата пак тврдат дека за околу 15 дена ќе им бидат исплатени парите, зошто тоа не го сториле до сега, одговор нема./Б.Н