(Видео) Попладнево и вечерва,село Мелница во општина Чашка, домаќин е на втора „Мелничка исселеничка средба“
![](https://duma.mk/wp-content/uploads/2024/07/Девојцинја.png)
Овие млади играорки од село Мелница ќе ве пречекаат и ќе ви посакаат добре дојде попладнево во село Мелница. По минатогодишното прва, извонредно посетена од мештаните на селото, на жителите на општина Чашка како и граѓани од Велес, вечерва во село Мелница се одржува втората „Мелничка исселеничка средба“. Тоа е културно забавна манифестација која започнува со дефиле на играорци а продолжува со презентација на културните и традиционални вредности на жителите од турската етничка заедница за да заврши со уметничка програма и настап на познати интерпретатори на македонска народна музика како и со забава за млади со Ди џеј од градот Бургдорф во Швајцарија.
![](https://duma.mk/wp-content/uploads/2024/07/БИНА-768x1024.jpg)
Ердован Етовски Еки е дел од Организациониот одбор на манифестацијата и еден е од основачите на здружение на граѓани исселеници „МАК МЕЛ“ во Швајцарија кое што многу е активно како во оваа европска држава така и дома, во Чашка и во Македонија. Етовски соопшти дека негови членови се 102 семејства на исселеници од Мелница само во Швајцарија и говори за иницијативата на овие исселеници токму во родното место да ја организираат веќе традиционалната „Мелничка исселеничка средба“.
Освен презентација на народни носии и фолклор, кои се карактеристични за оваа етничка заедница во мултинационалната општина Чашка, организаторите поканија и други гости. Упатија покана и до сите заинтересирани граѓани ширум Македонија.
Втора исселеничка „Мелничка средба“ започнува попладнево во 17:30 часот со Дефиле а потоа ќе се реализираат бројни настани на чија завршница присутните ќе уживаат во музички изведби на естрадни уметници додека младите се до полноќ на забава со Ди џеј.
![](https://duma.mk/wp-content/uploads/2024/07/Мелницка-средба-1024x682.jpg)
Организатори на културната манифестација се Општина Чашка, граѓанските здруженија „Мак Мел“ од Швајцарија и „Мел Мел“ од село Мелница.
Убавка Јаневска
![](https://duma.mk/wp-content/uploads/2021/05/SEMM.jpg)