Филипче за празниците во кругот на семејството: Сакам да бидам пример за граѓаните

30.12.2020

Министерот за здравство Венко Филипче ќе ја дочека новата година во домашни услови, во кругот на семејството. Тој денеска во изјава за медиумите апелира и до граѓаните да бидат совесни, да не се групираат и да ги почитуваат препораките за време на претстојните празници.

– Сакам да бидам пример за сите граѓани. Сега треба сите да ги почитуваме мерките и препораките и да сме свесни дека тоа е еден од механизмите со кои нема да дозволиме ситуацијата да се влоши сега кога навистина се изборивме и имаме видливи резултати, рече Филипче при примопредавање на германска донација во поликлиниката во Шуто Оризари.

Нагласи дека во изминатиот период е евидентно намалувањето на притисокот врз болниците и на бројот на новодијагностицирани.

Завчерашниот ден, како што истакна, е првиот ден кога на интерните клиники немало ниту еден нов прием на болни од ковид.

– Сега бројките значајно се намалуваат. Значичетелно се намалуваат новодијагноцираните на ден, значително се намалува факторот на преносливост и значително се намалуваат бројот на пациенти кои треба да се хоспитализираат. Болниците ширум државата се практично полупразни. На Инфективната клиника по подолг временски период има над 30 слободни кревети и на интерните клиники над 100 слободни кревети. Еден сериозно долг временски период, таа бројка на слободни кревети беше меѓу 20-30 кревети, рече Филипче, додавајќи дека спласнува и притисокот врз центрите за тестирање.

Филипче не исклучи можност да има некој мини-пик и натаму како резултат на непочитувањето на мерките. Но, како што посочи, здраствениот систем е подготвен да пресретне и следен бран.

– Ние нема да го смениме системот на реорганизација на јавно-здравствените институции додека не минат празниците, некаде до крајот на следниот месец. Верувам дека граѓаните ќе продолжат совесни да се однесуваат и дека ќе нема криза, но подготвени сме да пресретнеме таков бран, истакна Филипче.