Пристигнаа игри на Netflix – први се радуваат корисниците на Android

Netflix ги претстави своите први игри за паметни телефони кои првично ќе бидат достапни за корисниците на Android од целиот свет, објави блогот на компанијата.

Оваа недела, ново ажурирање е достапно за корисниците на Netflix Android и вклучува игри.

За почеток, ќе може да се играат пет игри: Stranger Things: 1984, Stranger Things 3: The Game, Card Blast, Teeter Up и Shooting Hoops.

„Иако ова е почеток на долго патување, ние сме возбудени што можеме да обезбедиме искуство за играње кое е различно од она што е моментално достапно – ексклузивни, без реклами, мобилни игри во апликација вклучени во вашата претплата на Netflix“, соопштија од компанијата.

Првите достапни игри имаат релативно едноставна графика и се лесни за играње, но Netflix додава дека со текот на времето планираат да создаваат игри за сите типови играчи.

Како што беше претходно истакнато, овонеделното ажурирање на апликацијата Netflix ќе се гледа само на уредите со Android, додека надградба за iOS уредите, односно Apple, се планира во наредните месеци.