Kaвадарци донесе буџет тежок околу 16 милиони евра

Нова детска градинка, доградба и преадаптација на веќе постоечки објекти во детска градинка, изградба на заобиколница Западен булевар, паркинг, реконструкција на уличното осветлување. Ова се само дел од проектите кои општина Кавадарци ќе ги реализира следната година, а ќе се покријат со пари од буџетот кој доцна попладне го усвои кавадаречкиот совет.

Општинската каса на Кавадарци за 2019 е планирано да тежи близу 16 милиони евра. Советниците дадоа едногласна поддршка и нагласија дека буџетот е прилично амбициозен.

„Предлог буџетот на општина Кавадарци е димензиониран на вкупен износ од 972.254.000 денари, од кои, основниот општински буџет изнесува 465 милиони денари, приходите од само финансирачки активности 55 милиони денари, приходите од дотации 370 милиони денари, прихоите од донации 16 милиони и прихдоите од кредити 65 милиони денари“ рече раководителот на секторот за финансии Цанка Јовановска, која даде образложение на финансискиот документ на Кавадарци за следната година.

Градоначалникот Митко Јанчев е оптимист дека во најголем процент планираните приходи ќе бидат реализирани.

„Во делот на развојната програма за 2019 година Кавадарци има предвидено поголема стапка на развој. Опфатени се повеќе јавни објекти. Го ставаме во програма зелениот пазар, паркингот, кружниот тек кај Тиквеш и порачани се повеќе физибилити студии за јавно приватно партнерство“ елаборираше Јанчев и нагласи дека повеќе проекти кои се тендерирани годинава ќе се финансираат со пари од буџетот за следната година.

Јанчев рече дека 2019 е година на многу предизвици во повеќе области за Кавадарци. Во буџетот Кавадарци има планирано и значајни средства што треба да ги добие од централната власт за проекти кои ќе ги финансира државата.

Општината испланира да издвои еден милион денари за поддршка на децата со ретки болести, а беше прифатен предлогот на советничката група на ВМРО-ДПМНЕ да се ослободат од плаќање данок на имот бранителите кои учествувале во воениот конфликт 2001 година.

Во приходите влегуваат и парите за данок на имот на новите 4500 граѓани кои досега не биле евидентирани во системот за данок на општината.

Ангел Данов