Антиваксерите со посебна агенда против вакцинацијата на децата, дезинформации на секој чекор за разни страшни болести

„Кога доаѓаат родителите во нашата служба за вакцинирање, измислуваат бројни причини со кои бараат одложување на примањето на вакцината кај децата. Најчесто тоа е болест. Но, не е можно нивните деца да се болни со години. Дел од нив се поискрени, па во разговор откриваме како тие читале на интернет за некакви последици по здравјето на сопственото дете од вакцинирање како што се, наводно, неможноста децата да проодат или аутизам, велат лекарите.

Автор: Убавка Јаневска

Дете на училишна возраст и четириесет и четиригодишен маж се заболени од голема кашлица во Кавадарци. Тоа се единствените два случаи во деветте општини на централниот дел на Македонија, вардарскиот.

Детето нема примено вакцина. Во неговиот вакцинален картон пишувало дека навреме нема примено ниту една од трите вакцини додека било бебе, ниту, пак, било ревакцинирано поради „одредена патолошка состојба“, која трае со години. Кавадарчанецот, пак, се заразил од болеста, но поради скриениот идентитет, Службата за превентивна заштита на Здравствен дом Кавадарци не може да ги провери податоците за примените дози на вакцини во детската и младинската возраст.

Доктор Мими Каровска, специјалист по училишна и адолесцентна медицина во Службата за превентивна здравствена заштита на Здравствен дом Кавадарци, открива дека здравствените домови во Македонија располагаат со регистри на податоци за вакциналниот статус на граѓаните од 1960 година.

„Станува збор за два изолирани случаи на болни од голема кашлица на подрачјето на Општина Кавадарци, во која стапката на вакцинација против голема кашлица со прва доза на шестовалентна вакцина изнесува дури 95 отсто. Вакцинацијата со втора доза, петовалентната, како и третата доза со шестовалентна вакцина изнесува 93,9 отсто, додека, пак, со прва ревакцинација 93,7 отсто. Ова се податоците за степенот на вакцинирање во 2023 година, од кои може да се заклучи дека опаѓа интересот на родителите за вакцинирање на своите деца по првата вакцина против голема кашлица“, вели доктор Каровска.

Службата за превентивна заштита во Кавадарци бележи благ пораст на степенот на вакцинирање во 2023 година на територијата на оваа и соседната Општина Росоман.

Според податоците за претходната 2022 година, процентот на вакцинација со прва доза на ди-те-пер вакцината, која се аплицира на двомесечна возраст, изнесува 84,6 отсто, со втората доза што бебињата ја примаат на три до четиримесечна возраст е 94 отсто, додека, пак, со третата доза што се аплицира на шест месеци изнесува 90,6 отсто. Реализацијата на првата ревакцинација, наменета за деца на возраст од 15 до 18 месеци, изнесува само 65,7 отсто, што е за 29,3 отсто под потребниот степен за постигнување колективен имунитет на населението.

КАМПАЊИ ПРОТИВ ВАКЦИНИТЕ

„Кога доаѓаат родителите  во нашата служба за вакцинирање, најчесто измислуваат бројни причини со кои бараат одложување на примањето на вакцината кај децата.  Најчесто тоа е болест. Но, не е можно нивните деца да се болни со години. Дел од нив се поискрени, па во разговор откриваме како тие читале на интернет за некакви последици по здравјето на сопственото дете од вакцинирањето, како што се, наводно, неможноста децата да проодат или аутизам. Ние разговараме со нив. Ги разубедуваме врз база на медицина со докази, на кои како лекари сме посветиле над десетина или 12 години на медицинско и специјализантско образование, како и речиси половина од работниот век на постојани доедукации“, додава д-р Каровска.

Докторката наброи неколку случаи во кои на родители им дозволувале да ја погледнат дозата на вакцината, да го прочитаат името на производителот и да го запишат за да го проверат бар кодот на дозата. Според неа, постојат и родители што барале да им биде пропишана вакцината за да можат да ја купат и да им ја стават на нивните деца во Грција.

„Со вториве родители водев долги разговори во кој им го објаснував случајот со нашата кавадарчанка, која од Крит, во Грција, ги носеше своите деца во Кавадарци за да ги примат вакцините затоа што таа не му веруваше на здравствениот систем во државата, во која е мажена и живее. Таа објаснуваше дека во Грција родителите ги купуваат вакцините во аптека за децата да ги примат во која било медицинска амбуланта наспроти специјализираните во нашата држава, кои набавките ги прават од врвни европски производители“, вели доктор Каровска.

Лекарката ги знае антиваксерите, чиј број не бил толку голем наспроти вкупниот број на родители на деца, од 306 до 355, кои подлежат на имунизација во овие две локални заедници. Тоа што ним им го порача е да не веруваат во доказите што се шират во затворените групи на социјалните мрежи, туку во медицина базирана на докази.

НАЈГОЛЕМИОТ СТРАВ Е ОД МРП ВАКЦИНАТА

„Еднаш посеано зрно на сомнеж  расте и тешко се запира, констатираше доктор Марина Тодорова, специјалист педијатар во службата на Здравствен дом Велес.

Таа открива дека според редовниот вакцинален календар за имунизација, најголемиот проблем се јавува кога децата навршуваат 12 месеци и треба да ја примаат вакцината МРП, поточно против морбили, рубеола и заушки. И во оваа Служба за превентивна здравствена заштита во државата, родители одбиваат вакцинирање на нивните деца, најчесто зборувајќи за страв поради некакви последици врз здравјето на децата, чиј вкупен број на годишно ниво се движи од 580 до 630 на територијата на општините Велес, Чашка и Градско, без да знаат дека станува збор за дезинформации.

-Проблемот за кој зборуваат родителите е последица на една Студија, која што излезе пред повеќе години и за многу брзо време беше побиена поради малиот број на испитаници на чии искази истражувачот ја темелеше последицата од вакцината поточно аутизмот. Научната јавност ја осуди оваа студија, објавена во стучното меѓународно списание „Ланцет“. Потоа студијата беше повлечена затоашто беа направени повеќе други испитување со учество и на 500.000 испитаници со сосема поинакви резултати. Тие испитувања ги следеа случаите од моментот на аплицирање на вакцината паралелно со податоците кои им беа ставени на располагање за развојот на детето од моментот на првата примена вакцина. Така се побија првичните тврдења за наводната поврзаност на МПР вакцината со аутизмот, рече д-р Тодоровска.

Според лекарката, родена во градот Одеса, во Украина и дипломец на софискиот Медицински факултет како и специјализант, педијатар на УКИМ, ако првичната студија го посеа семето на сомнеж дополнителни проблеми создаде и Глобалното Антиваксерско движење кое во Македонија доцни повеќе од една деценија. Последиците од неговото постоење во државата се чувствуваат последните пет до шест години.

-Во карактерот на луѓето е да го споделуваат почесто негативното искуство. Јас тоа го видов додека моите деца беа на возраст за вакцинирање. Тие се вакцинирани. Но, во контактите со мајките на нивните другарчиња, на славење на родендени или други значајни датуми и поводи, девет од присутните мајки слушаа а една споделуваше негативни искуства кои и биле пренесени од исто така мајки кои не ги доживеале туку слушале за наводни проблеми коишто ги предизвикала вакцината. Искуството најчесто беше за покачена температура или црвенило на рачето на детето. Така брзо се шират или изобличуваат приказните. Наместо тоа мајките и татковците потребно е се да споделат со лекарите и да дозволат да им приложиме медицински докази за да разговараме со докази, додаде др Тодоровска.

Стручњаците во бели мантили и државата се соочуваат со сериозен проблем пред се поради големата наметливост и авторитетност на родителите кои имаат негативен став кон вакцините. Иако не се многубројниантиваксерите се доволно гласни за да ги поколебаат или да ги замолчат побројните но и да внесат сомнеж без притоа на приоритетно место да го стават здравјето на сопствените деца кое се рефлектира врз колективното здравје и градењето на имуноотпорна заедница на заразни заболувања. Стручната фела е поборник на кампањи за докажување на вистината од една и од втора страна на континуирано подигнување на јавната свест токму на делот од популацијата кој бил вакциниран а сега се спротивставува на вакцинација. Тоа се мајки и татковци на возраст од 20 до 40 години и за кои во архивата на службите за вакцинација во Здравствените домови лесно можат да се видат податоци дека редовно примале вакцини. Нивните сомнежи биле беспредметни затоашто државата ги набавува вакцините од реномирани производители како што се „Санофи пастер“ од Франција за вакцинирање против голема кашлица и на американската компанија  „Мерк“ по чија лиценца се произведуваат вакцините против сипаници и заушки од страна на норвешки производител. Овие две вакцини ги користат сите земји членки на Европска Унија и останти држави во Европа. 

Исто како и во кавадаречката служба за превентивна заштита така и во велешката процентот на вакцинирани деца во 2023 година висок е и изнесува 95,1 отсто за прва и втора вакцина против голема кашлица,  до 12 месечна возраст, додека паѓа на 79,3 отсто кај првата ревакцинација до 18 месечна возраст како и на 74,9 отсто за вакцината против морбили, рубиола и заушки. Во 2022 година статистичките податоци покажуваат понизок за четири проценти на вакцинација против морбили, рубиола и заушки но за 2,3 % повисок кај ревакцината против голема кашлица додека останува ист при аплицирањето на вакцините до 12 месечна возраст.

Текстот е превземен од веб страната Јасно.мк