Афористичарот Димитар И. Вилазорски, првонаграден на конкурсот за најдобри афористичари во Македонија
29.03.2021
Велешанецот Вилазорски наградата ја освои за сет од десетина афоризми на тема Право и Правда.
При оценување на афоризмите, жирито во состав на претседател Љупчо Силјановски и членовите Иван Котев и Доне Донев, се воделе по принципот на Балашевиќ. Всушност ги почитувале формалните белези на сатиричниот афоризам како јадровитост, двосмисленост или повеќесмисленост но и вешто ракување, игра со зборови, слоевитост на мислата и свежина на духот.
На Конкурсот учествувале вкупно 23 пишувачи на афоризми. Од нив, второто место му припадна на Ацо Ѓорѓиев од Струмица и трето место на Јане Атанасов од Кочани. Како особено успешни сетови афоризми, издвоени се и на Васил Толевски и Марјан Ангеловски од Скопје, Миле Ѓорѓијоски од Делчево, Витомир Долински од Струга, Ристо Филчевски од Струмица и Драганчо Тасевски-Изворски од Кичево.
Доделувањето на наградите ќе се оддржи оваа сабота, на 4 април, во Кочани.
Покрај наградите на добитниците на овој настан ќе му биде доделена и плакета за животно дело на афористичарот и сатиричар Атанас Крлевски.
Стефани Манева
