Децата најголеми преносители, но најлесно се справија со коронавирусот

Објавено на 15 декември, 2021 во 12:05

Во охридскиот регион имаше голем број заболени деца со коронавирусот, но без сериозни компликации. Немаше деца на распиратор, кислородна поддршка, болничко лекување. Децата се најголеми преносители, но најлесно го поминуваат вирусот. Во моментот има мал број заболени деца со ковид, но има деца со полесни постковид психолошки проблеми, велат педијатрите 

Пишува: Соња Рилковска

Пандемијата со коронавирусот ги погоди и најмладите. Во изминатиов период охридскиот регион имаше голем број заболени деца од ковид-19, но немаше ниту еден случај со посериозни компликации, тешка клиничка слика, потреба од кислородна поддршка и тешки последици.

ДЕЦАТА ПОЛЕСНО СЕ ИЗБОРИЈА СО КОВИД-19

Децата се големи преносители, но најлесно се справија со коронавирусот, велат педијатрите од Охрид.

Генерално може да заклучам дека децата пандемијата ја минаа лесно. Со лесни симптоми на настинка, полесни горно и долно распираторни инфекции. Ништо значително и ништо поразлично од заболувањата претходите години. За разлика од повозрасните, децата поминаа со многу полесна клиничка слика без компликации, вели во изјава за „Вистиномер“ д-р Владо Колевски педијатар од Охрид.

На сметка на коронавирусот и рестрикциите значително се намалија другите инфекции. Но, со отворањето на училиштата, градинките, игротеките денес коронавирусот е во заден план.

Сите останати распираторни белодробни инфекции се намалија значително, може да кажам и до 90 отсто. Сето тоа се случи поради начинот на живот, рестрикциите, носење заштитни маски, несоцијализација, неработењето на училиштата, градинките, игротеките, а со тоа трансмисијата беше спречена. Во првиот момент кога се намалија рестриктивните мерки, се вратија тековните инфекции кои ги имаме до ден денес. Во моментот имаме многу малку деца заболени со коронавирусот, другите инфекции се доминантни, ковидот е во заден план, вели д-р Колевски.

Д-р Владо Колевски, педијатар од Охрид
Фото: Вистиномер

Протокол за лекување на децата – ковид позитивни немаше и сè уште нема. Но, матичните педијатри од Охрид велат дека избегнуваа да препишуваат антибиотици.

Протокол немавме, не добивме никакви упатства од Министерството за здравство. Главно ги лекувавме со стандардна витаминотерапија и изолација. Не дававме антибиотици. Ја следевме состојбата постојано и доколку се манифестираше наод на белите дробови во консултација со инфектолозите се даваше терапија,  вели во изјава за „Вистиномер“ д-р Никола Филев, педијатар од Охрид.

д-р Никола Филев, педијатар од Охрид Фото: Вистиномер

Од охридската болница велат дека само неколку деца од охридскиот регион биле испратени на болничко лекување во болницата Козле во Скопје.

Децата релативно лесно го поминаа коронавирусот, што е нависина факт кој радува. Повеќето се лекуваа амбулантски на педијатрија. Имавме само неколку деца кои ги испративме на лекување во Козле и тие не беа тешки случаи, но знаете стравот е голем, а така налагаа и правилата, вели д-р Горан Балевски директор на ЈЗУ„Општа болница Охрид“.

Д-р Горан Балески, директор на ЈЗУ „Општа болница Охрид“ Фото: Вистиномер

КОВИД-19 ОСТАВИ ПСИХОЛОШКИ ТРАГИ И КАЈ ДЕЦАТА

Нема никакви последици од ковид-19 врз физичкото здравје кај прележаните деца, меѓутоа, кај дел од нив има траги врз психолошката состојба.

Во поголемите пикови и бранови на пандемијата имаше голем број деца заболени од коронавирусот, ама немаше тешки случаи со здравствени компликации. Но, сега загрижува тоа што има деца кои се соочуваат со некои полесни постковид психолошки проблеми.

Имавме многу голем број заболени деца, но речиси повеќето поминаа со лесни симптоми како обична настинка. Знам многу деца кои по прележувањето на болеста преминаа во опсесивна депресивна форма. Тоа го манифестораат со постојано миење, капење, одржување на хигиена. Има и такви кои од страв не излегуваат од дома. Наспроти нив секако има и деца кои прележаа корона и немаат никакви постковид компликации, ниту психолошки, ниту физички, вели доктор Филев.

Во само неколку месеци, ковид-19 го промени животот на децата и семејствата низ целиот свет. Карантинските мерки затворањето на училиштата, градинките и ограничувањето на движењето, иако потребни, сепак ги нарушија навиките на децата и системите за поддршка. Исто така, тоа значи поголем стрес за нив. Некои деца, поради стигмата околу ковид-19, станаа поранливи на насилство и психо-социјален притисок. Затоа Уницеф издаде Стручни упатства: Заштита на децата за време на пандемија на корона вирус.

Децата на секоја возраст може да се разболат од ковид-19. Иако децата и возрасните доживуваат слични симптоми, болеста кај децата обично е помалку сериозна отколку кај возрасните, се наведува во објавата на УНИЦЕФ, насловена:Што треба родителите да знаат за болеста што ја предизвикува корона вирусот (КОВИД 19)“

Според  извештаите на Институтот за јавно здравје најмалку заразени се забележани  кај децата до 9 години. И светските, но и домашните искуства покажуваат дека децата релативно полесно го поднесуваат и пребродуваат разорниот вирус, кој однесе милиони животи.

Овој напис е изработен во рамките на Проектот за брзо справување со вакциналните дезинформации, имплементиран од Фондацијата МетаморфозисТој е првично објавен во Вистиномер, а e овозможен со поддршка на Балканскиот фонд за демократија, проект на Германскиот Маршалов фонд на САД (BTD – The Balkan Trust for Democracy, a project of the German Marshall Fund of the United States). Содржината на написот е одговорност на авторот и не секогаш ги одразува ставовите на Метаморфозис, БТД или нивните партнери.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар

Сподели:

Напиши коментар

Станете член на ДУМА.мк и споделете го вашето мислење преку коментар. Кликнете тука за да се најавите.