Се поизвесно дека дел од центарот на Велес ќе добие нов лик
Изградба на атмосферска канализација на улицата „8-ми септември“, изградба на два кружни текови, велосипедска патека, обезбедување на нови паметни автобуски постојки, електрично возило и електрични рикши за туристи и посетители, паметни услуги за јавен превоз со интегрирана платформа, паметни електрични велосипеди и систем за нивно споделување, паметно осветлување во центарот на градот и паметни клупи и друга опрема и софтвер. Овие градежни зафати треба сосема да го променат изгледот на овој дел на градот.
Новиот лик на централното подрачје е составен дел на проектот „Паметни решенија-продолжуваме“ што општината го конкурираше во европската комисија каде според градоначалникот Аце Коцевски поминала веќе две фази на одобрување.
– Искрено се надевам дека ќе успееме да ја поминеме и финалната фаза на одобрување на проектот и дека во согласност со нашата Стратегија за паметен град и Планот за одржлива урбана мобилност , Велес ќе направи пионерски чекори во развојот на паметните градови не само помеѓу македонските општини, туку и пошироко во регионот. Искрено се надевам дека сите граѓанки и граѓани на Велес ќе го поддржат овој значаен проект, додаде Коцевски на денешната прес конференција.
Вкупната вредност на проектот изнесува 751.504,34 евра од кои 85% ги обезбедува Европската унија додека 15% од сумата ги обезбедува општината кои на крајот ќе и бидат вратени од Министерството за локална самоуправа.
Стефани Манева
