Свечено отворени првите спортски игри – Атлантис инвест груп

На платото пред спортските игралишта во градскиот парк, вчера, свечено беа отворени првите спортски игри – Атлантис инвест груп. Игрите ќе траат четири дена и натпревари ќе има во четири спорта и тоа баскет, мал фудбал, одбојка на песок и тенис. Градоначалникот на Општина Велес, Марко Колев ги поздрави присутните и ги прогласи игрите за отворени.

-Сакам да ги поттикнам сите млади велешани коишто имаат идеја да дојдат во просториите на Општина Велес, да ме побараат, да се видат со службите со цел спортот, културата и сите други убави работи коишто не обединуваат да ги вратиме на терените, просториите секаде во Велес. Игрите ги отворам, најдобрите да победат, да спортуваме, да се дружиме и смееме, додаде Колев.

Организаторот Бубе Црвенпанов од „Евентив“ посебно се заблагодари до Виктор Гунов, Филип Алчев и Гордан Јорданов коишто ги организираат годинешните спортски игри.

-Оваа идеја ја имавме неколку години меѓутоа годинава седнавме, ја ставивме на хартија и ја промовиравме пред Општина Велес и на наша огромна радост наидовме на безрезевна поддршка. Велес е град со богата спортска традиција, Велес е град кој во изминатите години изумира спортски и ова го правиме многу луѓе, многу голема организација. Се надевам дека убаво ќе си поминуваме во наредните четири дена. Оваа година имаме четири спорта и се надеваме дека овој настан ќе биде традиционален и ќе се зголемуваат деновите, додаде Црвенпанов.

Пред присутните се обрати и Панче Ќумбев еден од најдобрите спортисти на Велес.

-Јас припаѓам на една средна генерација и морам да признаам дека некои 10 години бевме во мрак со спортот во Велес. Многу ми е мило што Велес се враќа на мапата на спортот. Мило ми е што се враќа она што Велес од секогаш го имал. Градот на Пепи Манасков, оние што не знаете, Кире Лазаров е роден во Велес, градот на покојниот Зоран Паунов и така натаму. Се надевам овие игри ќе растат во голема традиција бидејќи Велес ова го заслужува, додаде Ќумбев.

Генералниот покровител Дејан Мирсинов од Атлантис инвест груп посебно се заблагодари до Општина Велес, Јавното комунално претпријатие „Дервен“, ЈП Парк, спорт и паркинзи.

-Децата од Евентиве коишто го организираат овој настан се со големо срце. Несебично се вложија во проектот и се надевам дека понатаму ќе ги вклучиме сите спортски терени, како што се фудбалското игралиште, спортската сала, базентот и следната година да направиме уште поголеми спортски игри. Се додека има луѓе коишто не себично би се вложиле, јас ќе ги поддржам игрите и понатаму. До овде бевме ние битни, сега се битни спортистите, гледачите, посетителите овие четири дена. Опуштете се и уживајте, додаде Мирсинов.

Учество ќе земат неколку стотини спортисти и за победниците на игрите предвидени се богати награди.

Лазар Лазаревски