Целосно уништен дрворедот на улица „АСНОМ“ во Велес од страна на непознат сторител

06.04.2021

Вкупно 14 садници во одлична вегетациска состојба се исечени со пила од страна на несовесен граѓанин на 29 и 30 март, покрај фабриката „Благој Ѓорев“ во Велес. Од страна на општинскиот комунален инспектор е извршен увид на местото при што не е утврден сторителот. Но според начинот на сечење на дрвјата дејствието е сторено со намера и е направена голема штета.

– Ги повикувам надлежните државни институции доколку имаат било какви сознанија да откријат кој е сторителот и да превземат најсоодветни мерки за негово казнување. Затоа што мое мислење е дека сечењето на дрвја на ваков начин е вистинско злосторство што го прават кон сите нас, бидејќи секое дрво за нас значи живот затоа што го прочистува воздухот, рече градоначалникот Аце Коцевски на денешната прес-конференција.

Сите дрвја засадени на различни локации имаат големо влијание врз квалитетот на амбиенталниот воздух и овие садници засадени на улицата „АСНОМ“ имаат потенцијал да бидат мал но корисен филтер во непосредната животна средина.

Во пролетниот период во Општина Велес засадени се вкупно 260 високи повеќегодишни листопадни дрвја, кај Еко камп на езеро „Младост“, Градски парк, Паркот кај Гимназија како и Пaркот пред општинската зграда. Поради временските услови засадувањето ќе продолжи во есенскиот период.

Стефани Манева