Јавен оглас за финансиска поддршка за струја за домаќинства со лица со попреченост

Ранливите потрошувачи на електрична енергија ќе можат да аплицираат за финансиска поддршка на јавен оглас објавен од Министерството за енергетика, рударство и минерални суровини.

Огласот објавен е согласно Програмата за заштита на ранливи потрошувачи на енергија за 2025 година, со која министерството обезбеди 42.3 милиони денари финансиска поддршка.

„Право на поддршка имаат домаќинства со едно или повеќе лица со тешка или длабока интелектуална попреченост, со најтешка телесна попреченост, потполно слепо лице и глуво лице, корисници на посебен надоместок заради попреченост со навршени 26 години возраст, а без оглед на старосната возраст, согласно член 44 од Законот за социјалната заштита, чиј вкупен нето доход кој подлежи на оданочување на месечно ниво согласно Законот за данокот на личен доход на членовите на домаќинството во 2024 година не го надминувал износот од 24.500,00 денари за едночлено домаќинство, 42.000, 00 денари за домаќинство со два члена, 60.000, 00 денари за домаќинство со три члена и 80.000,00 денари за домаќинство со четири и повеќе члена, не сметајќи го посебниот надоместок согласно Законот за социјалната заштита“, пишува во јавниот оглас на министерството.

Барањето се поднесува со пополнет образец кој е достапен во архивата на Министерството или на www.energy.gov.mk, каде се објавени сите останати документи кои се задолжителни да се достават со барањето.

Дума.мк