Новогодишен пакет на Пошта за испраќање честитки и подароци со цел да се обнови традицијата

15.12.2020

На седница на Управниот одбор на „Пошта на С.Македонија“ се усвои промотивниот пакет кој опфаќа испраќање на празнични честитки а кој ќе започне да важи од 19. декември заклучно со 15. следниот месец.

Од Пошта посочуваат дека на овој начин сакаат да се приклучат, со цел да се обнови традицијата на праќање честитка или подарок по пошта. Со тоа да се врати радоста по сите предизвици оваа измината година, и да се измами насмевка кај најблиските во целиот свет, што како што велат, е повеќе од неопходно во овој период кога се соочуваме со Ковид криза.

Со промотивниот пакет, усвоен на седница на Управниот одбор на АД „Пошта на Северна Македонија“, се намалуваат цените за достава на пратки од адреса до адреса со тежина до пет килограми. Новата цена на услугата изнесува 80 денари во промотивниот период. Секое заинтересирано лице кое сака да испрати пратка од која било адреса на територија на град Скопје тоа може да го направи со јавување на телефонскиот број 15 000. Службени лица на Пошта ја преземаат пратката/подарокот од адресата на испраќачот и ја доставуваат на наведената адреса на примачот. Во другите населени места, граѓаните можат да ги достават пратките до единиците на поштенската мрежа, а оттаму службените лица на Пошта ќе ги испорачаат до адресата на примачот, информираат од Поштата.

Пакетот опфаќа и печатење на единечни празнични честитки изработени исклучиво од еко хартија, кои ќе бидат со ретро дизајн, како и нивна продажба на шалтерите на „Пошта“ од 19 месецов. Цената за поштенско испраќање на една ваква честитка ќе изнесува девет денари. Дополнително, до крајот на оваа работна недела, јавно ќе биде објавена и продажната цена на честитките.

-На овој начин, сакаме да ги повикаме сите да ни се приклучат, со цел заедно да ја обновиме традицијата на испраќање честитка или подарок по пошта. Но исто така, на крајот на годината, која ни го промени секојдневното функционирање, да предизвикаме радост и насмевки кај нашите блиски и сакани во земјата и низ целиот свет, повеќе од неопходни во време на пандемија предизвикана од коронавирусот, истакнуваат од националната Пошта.

Ги повикуваат сите заинтересирани граѓани кои сакаат да ја поддржат оваа акција на социјалните мрежи да ги користат „#ПоштаМКД #ИспратиЧеститка #ИспратиПодарок“, или да испратат свое видео со повик и поддршка на оваа акција на официјалната Фејсбук страна на компанијата: https://www.facebook.com/postamkd.

Фото: Слободен печат/Утрински брифинг