Објавен Јавниот повик за признанието „Успешни млади“ за 2022 година

Кабинетот на Претседателот на Република Северна Македонија продолжува со имплементација на проектот „Успешни млади“, признание кое што се доделува во насока на вреднување на трудот и знаењето на младите, како една од политиките за намалување на одливот на млади луѓе од нашата земја, како и за создавање на перспективи за младите и успешни кадри.

„Признанието е поттик на научноистражувачката мисла и уметничката работа на младите, за резултати постигнати во текот на 2022 година, во следните осум категории: Најдобар/а млад/а научник/чка во општествените науки; Најдобар/а млад/а научник/чка во хуманистичките науки; Најдобар/а млад/а научник/чка во природно-математичките и техничките науки; Најдобар/а млад/а научник/чка во медицинските науки; Најдобар/а млад/а иноватор/ка; Млад талент (за ученици и ученички од средните училишта); Признание за постигнат особен успех и за афирмација на инклузијата (за млади со попреченост) и Најдобар/а млад/а уметник/чка,“ соопшти кабинетот.

Јавниот повик ги опфаќа сите лица што заклучно со 2022 година навршуваат 35 години, а кои постигнале значајни резултати во соодветната категорија, освен за шестата категорија (млад талент) за која можат да се пријават само ученици и ученички од средните училишта.

Јавниот повик за доставување пријави за признанието „Успешни млади“ за 2022 година е отворен од денеска и ќе трае до 01 октомври 2023 година. Тој е јавно достапен и во него детално се наведени условите и начинот за доставување на пријавите. Објавата на веб-страницата на Претседателот на Република Северна Македонија е на : македонски јазик: http://bitly.ws/SeWZ, албански јазик: http://bitly.ws/SeXr и англиски јазик: http://bitly.ws/SeXF.

„Препознавајќи ги социо-економските предуслови на поединците како значаен фактор во пристапот и можностите за образование и професионален напредок, со овој повик особено ги охрабруваме сите млади кои припаѓаат на ранливи категории да поднесат апликации за признанието „Успешни млади”, соопшти кабинетот на македонскиот Претседател.

Дума.мк