Без соодветен медицински третман живеат болните од пулмонална хипертензија во државата
Десетината пациенти во државата кои боледуваат од пулмонална хипертензија се уште немаат соодветен медицински третман. Тие секојдневно се соочуваат со недостиг од лекови кои ги нема на позитивната листа, па мораат да ги набавуваат на црно од странство. Без терпија и кислород тие не можат да си го замислат животот, но ниту по една година откако преку кампања ја запознаа јавноста со оваа ретка болест и побараа институциите да им помогнат, не добија ништо. Државата не им отвори ниту центар во кој ќе се лекуваат. Со нарушено здравје но упорни и храбри, овие луѓе и годинава излегоа пред јавноста да си ги кажат маките.
„За оваа болест во светот постојат 14 третмани кои ги користат луѓето заболени од оваа болест и тие имаат нормален живот, па можат дури и да работат. Во Македонија се направија само некои мали чекори, се стави во регистра болеста , но се уште имаме само еден единствен лек кој што не можат да го користат сите пациенти а нив се повеќе им се влошува здравствената состојба. Потребна ни е комбинирана терапија. Некои од нас дури се и во критична здравствена состојба. Ние се бориме за здив но не можеме да го најдеме решението затоа што немаме помош“, рече Ѓурѓица Ќаева од Здружението на граѓани „МоментПлус“.
Триесет и седум годишната Ќаева е една од десетте граѓани во државата кои живеат со оваа ретка болест. За разлика од лани таа сега е со уште понарушено здравје, со ослабено срце, а лекарите и препорачале дури и трансплантација на бели дробови. Секојдневно се бори за здив бидејќи во државата нема лекови. Принудена е да ги набави од странство а за месечна доза плаќа и по 1.500 евра.
„Преку оваа кампања сакаме луѓето да знаат за оваа болест, дека ние се уште сме тука. Потребно е државата да направи чекор напред во лекувањето не само заради нас туку и за идните генерации. Потребно е во државата да има центар за рана дијагностика, бидејќи болеста не избира возраст, може да се појави кај секого. Кога болеста ќе биде навреме дијагностицирана, тогаш и трошоците на државата ќе биде помали и заболените ќе имаат понормален живот. Многу би ни значело и да има некој центар за рехабилитација, на некое планинско место каде има чист воздух, кој нам ни е многу потребен“, рече Ќаева.
Поддршка на овие луѓе и годинава им даде општина Чашка, а членовите на Здружението „Зелен рај“ повторно ќе се искачат на врвот Кадиица.
„Минатата година кажавме дека повторно ќе бидеме заедно со овие луѓе и еве сме пак заедно. Со нив ќе бидеме и во иднина бидејќи току оваа општина може најмногу да им помогне на луѓето со нарушено здравје. Се надевам дека со чистиот воздух кој тука го има во изобилие ќе придонесеме барем малку во подобрувањето на нивното здравје. “, рече градоначалникот на општина Чашка, Горанчо Пановски.
„На 21 и 22 мај ќе се искачиме на врвит Кадиица, Кога ќе се качиме горе и кога ќе ја ставиме таа точка, ќе ја пратиме пораката до сите дека ние се качивме на врвот, го земавме здивот и им го даваме на тие што го немаат. Да бидат живи и здрави и имаат право и заслужуваат да живеат повеќе“, рече претседателот на „Зелен рај“ Зоран Игновски.
Кампањата на Здружението „Момент плус“ е во насока на отворање на специјализирани медицински центри, соодветна медицинска терапија и стручен кадар за пулмонална хипертензија во државата. Во спротивно овие луѓе можат да се соочат со траен инвалидитет како последица од болеста./Д.С