Коцевски: Општината има резултати но и планови со уште поголеми очекувања во Новата 2019 година

Во изминатава година Општина Велес врати огромни долгови и сепак успеа да изгради инфраструктура кој прикажана низ бројки изнесува издадени 365 налози за градежни зафати во градот и населените места во вредност од речиси 100 милиони денари што во споредба со 2017 изнесува двојно повеќе налози и за 33 милиони денари повеќе во пари. Во новогодишното обраќање на градоначалникот Аце Коцевски, исто така, беше соопштено дека и по другите основи на полнење, трошење и реализација на општинскиот буџет биле подобрени показателите во споредба со минатата година.

– Во следната година ќе вложиме многу во зголемување на транспарентноста на општината кон граѓаните. Оваа сала каде што сте денеска во иднина ќе биде сала за одржување на седници на Советот на општината и во неа ќе можат да присуствуваат граѓани кои со претходна најава ќе можат да им се обратат на членовите на Советот, да им постават прашања од секојдневниот живот или да следат донесување на Детални урбанистички планови итн. Со државните институции ќе работиме на отворање на нов Граѓански сервисен центар со центар за услуги на граѓаните во кој тие на едно место ќе можат да ги добијат сите услуги од локалната и централната власт. Општината работи на Стратегија за „Паметен град 2020 – 2030“ што ќе ја усвоиме на седница во месец јануари 2019 година затоа што е веќе готова. Паралелно на ова потпишавме Договор со словенечка компанија за да изработиме План за урбана одржлива мобилност со сосема нов концепт на одвивање на сообраќајот во нашиот град. Се ова ќе правиме согласно директивите на ЕУ за да можеме да конкурираме за користење на средства од фондовите на ЕУ“, рече Коцевски.

Тој упати благодарност до вработените во општината,бизнис заедницата и Вардарски плански регион за добиениот грант од над 1 милион евра од Светска банка за проектот „Смарт езеро Младост“ што треба да се реализира до наредната туристичка сезона со што ќе се подобрат условите за развој на туризмот и особено на транзитниот туризам на Езеро Младост. Како главни преокупации на Општината во новата година ги издвои згрижувањето на децата во детските градинки најавувајќи дека за да се зголеми бројот на згрижување на деца нов клон ќе биде отворен во поранешното ОУ „Јордан Хаџи Константинов Џинот“ како и изградба на уште еден клон во новиот дел на градот, воведување на дуално образование во училиштата со проектирање на образовниот профил според потребите на бизнис заедницата, реформа на мрежата на основни и средни училишта поради драстично намалениот број на ученици и спојување на основните „Благој Кирков“ и „Јордан Хаџи Константинов Џинот“ во ново училиште „Панко Брашнаров“, изградба на по едно ново училиште во селата Иванковци и Клуковец, реконструкција на топловодните системи во ООУ „Блаже Конески“ и во училиштето во село Бузалково како и и санитарните јазли во неколку училишни згради додека училиштето во Сујаклари ќе подлежи на целосна реконструкција поради планирана трансформација од деветолетка во петолетка.

– Посакувам како држава да изградиме систем во кој талентите ќе се препознаваат од најрана возраст, како што е нашиот млад генијалец Кристијан Арсов, а држвата да обезбеди средства за брз напредок за да не ни се случи наместо ние да го препознаат САД или европските земји и да ни го земат. Системски треба да се решаваат лекувањата на болните дечиња. Нивното здравје не треба да оставиме да зависи од добрата волја на донаторите туку со системско решение да се спаси нечиј живот и да се подобри нивното здравје. Ние правиме што можеме во рамките на можностите како што е случајот сега со малата Бисера Здравковски на која и е потребна итна операција на срцето и на која општината ќе и помогне со финансиски средства исто како што претходно помогнавме и за лекувањето на малиот Кристијан кој треба неколку пати да се оперира во Турција, рече Коцевски.

Тој додаде дека во наредната година ќе профункционира Младинскиот културен и креативен центар во Велес, по пат на јавно приватно партнерство или од средства на општината да започне реконструкцијата на Градскиот пазар или со концесија изградата на поранешниот Офицерски дом, Градскиот базен и други објекти под надлежност на општината.

– Моите очекувања во наредната година се големи од Јавните претпријатија „Велес гас“ и „Велес паркинг“ со кои склучивме договор за отпочнување на гасификацијата на Велес. Ако се оди по ред и согласно договорите од Владата очекувам јавните институции како што се судот, општината, училиштата и градинките да бидат приклучени на градска гасификациска мрежа Иако малку се одложија работите очекувам во ред да го доведеме и зонското паркирање во градот затоа што мислам дека ќе ја подобриме состојбата со недостигот на паркинг места како и со изградба на катна гаража во потесното централно градско подрачје. Резултати очекувам и од првата сообраќајна Студија со новите сообраќајни решенија. На прво место да бидат пешаците, на второ велосипедистите, на трето место добро организиран јавен градски превоз и дури на четврто место да бидат нашите приватни автомобили. Тоа е концепт на создавање на многу пешачки и велосипедски патеки и истиснување на возилата од централното градско подрачје, рече Коцевски.

Градоначалникот соопшти дека годинава биле организирани 30 значајни културни манифестации од кои седум меѓународни и што успеале да го вратат сјајот на „Рациновите средби“, и покрај тоа што не биле планирани се реализираа Фестивалот на античка драма „Стоби“ и Фестивалот на пита и вино. По синокешното гостување на Македонската Опера на 9 февруари го најави гостувањето на Македонскиот балет со претставата „Ибер Танго“ како и концертот на Филхармонијата.

– Мене ми е жал што дел од спортските клубови неможат да сватат дека општината нема ни финансиски можности ниту капацитет да финансисра врвен спорт. Чарето во спортот е во искористување на законските можности дел од добивката фирмите да ја инвестираат во спортските клубови наместо да ги плаќаат како данок на државата. Наша обрска е да го финансираме училишниот и масовниот спорт. Затоа вгодина ќе правиме напори да ги финансираме трите меѓународни манифестации Пливачкиот маратон, атлетскиот маратон и Мото кросот на Езеро Младост за да прераснат во реномирани меѓународни спортски манифестации, рече Коцевски.

Во делот на социјалните услуги Градоначалникот ја издвои соработката со Црвениот крст во делот на помошта и грижата на старите лица додека во областа на заштитата на животната средина најави дека по добивањето на концесијата за топилничарската згура на друга фирма очекува конечно да започне дислокацијата на црниот рид позади поранешна Топилница и повтори дека во името на граѓаните ќе продолжи битката со новиот загадувач „Техно павер“ и каменоломот во поранешната варница во Превалец.

– Годишно ќе организираме по две масовни акции за пошумување за да ги пошумиме голите ридови околу Велес откако реализиравме две масовни акции за чистење од смет на градот. Ке работиме на енергетска ефикасност и ќе подигаме нови дрвореди и зелени ѕидови. Првиот зелен сид ќе биде над кружниот тек кај Штипско џаде, рече Коцевски.

Тој додаде дека се зголемуваат и развиваат капацитетите на територијалната противпожарна единица која ќе се развива во насока да биде подготвена да интервенира при поголеми сообраќајни несреќи или елементарни непогоди. Коцевски очекува Владата да го продолжи процесот на децентарализација за да можат да добијат многу повеќе надлежности и пари за да се оствари планираниот рамномерниот регионален развој. Градоначалникот упати јавна благодарност до меѓународната заедница, бизнис секторот и сите организации и поединци кои помогнаа за развојот на Велес. Се заблагодари за поддршката на членовите на Советот на Општината од позицијата и упати благодарност до опозицијата која и преку критиката покажала конструктивност .

– Сакам прво на сите вас присутни во салата да ви ја честитам Новата година и претстојните божиќни празници а потоа и на сите Велешани, независно каде и да се на земјината топка. Да ви посакам добро здравје, среќа, радост, мир, спокојство како вам и на Вашите семејства и на личен и на професионален план, рече Коцевски.

На свеченоста денеска беа доделени повеќе награди на успешни граѓани, работници, хумани личности, талентирани ученици и студенти како и генијалци./У.Ј