Дел од Windows ќе биде со отворен код и светот повеќе не ќе биде ист
Со години, Microsoft е демонизиран како најголем непријател на софтвер со отворен код, но времињата се менуваат, а со нив и самата компанија.
Microsoft денес ја поседува платформата GitHub, која е центар на споделувањето на софтвер. Сепак, досега, гигантот не се одлучи да пушти отворен изворен код во „бисерот на својата круна“: Windows. Но, и тоа наскоро нема да биде така.
Се тврди дека Windows Core OS компонентата ќе содржи софтвер со отворен код. Microsoft Edge исто така ќе го прифати и софтверот со отворен код на Chromium, компонента што дефинитивно може да се појави во Windows Core OS. Друга опција е технологијата на Windows за репродукција на застарените Win32 апликации на сигурен начин во модерните верзии на оперативниот систем.
Со оглед на самата природа на софтверот со отворен код, малку е веројатно дека Microsoft долго ќе ги задржи во тајна своите планови. И тоа значи дека наскоро може да имаме повеќе детали за напорите на компанијата во однос на компонентата Windows Core OS. И јасно е дека во динамичниот свет на современиот софтвер, никој не може да си дозволи да остане скриен зад сопствените ѕидови, без разлика колку цврсти тие изгледаат – како што посочи самиот Сатја Надела неодамна.