Две истрага за два случаи на сексуално насилство врз деца во Кавадарци, побаран притвор за осомничен силувач

Основното јавно обвинителство Кавадарци донесе Наредба за спроведување истражна постапка за  два одвоени случаи во кои има сомненија за кривично дело – Силување на дете кое не наполнило 15 години од член 188 од Кривичниот зaконик.

„Во првиот случај, осомничени се две полнолетни лица од Неготино, кои најпрво сториле кривично дело – Задоволување полови страсти пред друг од член 190 од Кривичниот законик. Тие имале сексуални односи пред малолетно дете, кое ги снимало со мобилен телефон. Во јули лани, додека детето имало 14 години, еден од двајцата осомничени повеќе пати го наведувал малолетникот на сексуални односи со него за што му давал одредени парични средства. Јавниот обвинител предложи мерка притвор за осомничениот за силување на дете, за кое е запретена казна затвор од најмалку 8 години,“ пишува во соопштението на обвинителството.

Во втората постапка на ОЈО Кавадарци предложена е и мерка притвор против татко од Кавадарци осомничен за други полови дејствија спрема неговата 13-годишна ќерка.

„Тој во алкохолизирана состојба го допирал девојчето во повеќе наврати, со што постои сомнение дека сторил кривично дело од ставот 5 на членот 188 за кое е запретена казна затвор од најмалку три години,“ соопшти обвинителството.

Убавка Јаневска