Василевски, еден од 12 ученици натпреварувачи и ССОУ„Коле Неделковски“ домаќин на државниот натпревар на електомашински и сообраќајни училишни центри (ФОТО)

Ученикот Трајче Василевки од трета година е само еден од вкупно 12 ученици на ССОУ„Коле Неделковски“ коишто денеска се натпреваруваат  на Државните натпревари на електромашинските  и сообраќајните  училишни центри во Македонија.  На натпреварите коишто годинава се одржуваат во средното училиште во кое Василевски се образува учествуваат вкупно 100 средношколци натпреварувачи од државата.

Со Трајче Василевски разговаравме непосредно пред почетокот на натпреварот. Тој вети дека ќе се обиде да ги повтори резултатите што ги постигна на општинскиот и на регионалниот натпревар на ученици од струката електротехничар за компјутерска техника и автоматика.

-Најчесто одговорите на прашањата коишто се составен дел на писмен тест се од материјалот што ние го учиме од стручните предмети. Дел од прашањата на општинскиот и на регионалниот натпревар, на кои јас освоив по 78 поени или втори места, беа лесни но дел и потешки на кои потрошив најмногу време при одговарањето. Денеска се натпреварувам на државен натпревар и очекувам најдобрите да бидат победници. Им посакувам среќа на сите ученици што денеска се натпреваруваат во моето училиште, додаде Василевски.

Според него од големо значење во подготовката за натпреварите била работата со професорите ментори. Лично со Василевски  за општинскиот, регионалниот и државниот натпревар работеле четворица професори ментори на ССОУ„Коле Неделковски“. Трајче, исто така,  потенцираше дека за постигнување на резултатите влијаеле и знаењата стекнати како од теоретската така и од практичната настава што се изведува во ова средно училиште во градот.

Градоначалникот на Општина Велес Марко Колев  пред да го прогласи за отворен државниот натпревар рече дека образованието е клучно за развојот на државата.

-Јас особено го следам развојот на ова училиште затоашто тука го завршив средното образование. Се што во него се случува во изминатите 10 до 15 години добро е  и така треба да продолжи. Нека победат најдобрите и да им посакаме среќа на сите ученици коишто се натпреваруваат, додаде Колев.

Директорката на ССОУ„Коле Неделковски“,Весна Стојанова Богоевска, им посака добредојде на сите натпреварувачи, ментори, гости како домашни така и од збратименото училиште „Техничка школа“ од Власотинце,  соседна Србија. Таа истакна дека по две годишна пауза, поради ковид пандемијата, да се биде домаќин на држани натпревари претставува огромна чест и задоволство.

-Се надевам дека денеска како домаќини ќе бидеме уште еден показател на фактот дека можат да одат заедно теоријата и праксата како и на тоа дека искуството, младоста, знаењето и вештините можат да бидат преточени во дела. И понатаму ќе докажуваме дека сме училиште во кое стекнатото знаење и вештини се барани на пазарот на труд, додаде Стојанова Богоевска.

На настанот се обрати и претседателот на Здружението на електромашински и сообраќајни училишни центри, Драган Јаневски. Резултатите и победниците на годинешните натпревари ќе бидат познати денеска, во попладневните часови.

Убавка Јаневска