На продажба парцели во Велес и на езеро Младост!
Се продаваат осумте парцели на брегот на велешко езеро, за изградба на хотели и мотели, кои претходно во неколку наврати не успеа да ги продаде министерството за транспорт и врски. Сега, за првпат ги продава општина Велес за 283 денари по метар квадратен.
Освен нив на продажба општината стави и четири локации во градот. На две заинтересирани инвеститори ќе можат да градат колективни стамбени згради. Тие се наоѓаат на атрактивна локација во горниот дел на дворот на касарната и имаат излез на главната градска улица Благој Ѓорев. Почетната продажна цена изнесува 1680 денари за метар квадратен.
На оваа продажба на парцели на градежно неизградено земјиште можат да учествуваат и граѓани заинтересирани за изградба на куќи. Во населбата Тунел се продаваат две парцели со почетна цена од 61 денар за метар квадратен.
Општината очекува да се продадат сите парцелите особено оние на велешко езеро за кои постоела заинтересираност.
– Овие локации се наоѓаат веднаш над бродот значи на горниот дел од патот. За нив ни се јавуваа заинтересирани лица а колкава ќе биде заинтересираноста очекуваме да видиме на јавното електронско наддавање – рече Елизабета Јовчевска од општина Велес.
Општината работи на инфраструктурното доуредување на овој дел од крајбрежјето. Таму има вода сега се работат проектите за одводната мрежа, електричната енергија и телефон. Паралелно со ова од овој дел на езерото ќе треба да се тргнат диво поставените приколки и кампови кои во најголем дел се сопственост на велешани.
– Тие ќе бидат дислоцирани. Теренот ќе мора да се ослободи затоа граѓаните прво ќе бидат замолени или во спротивно ќе мора да се врши присилно исселување – рече Јовчевска
Продажбата на плацеви е огласена. Заинтересираните веќе можат да аплицираат за јавната електронска продажба, која според законските рокови, ќе треба да се случи на почетокот на јули, годинава./Б.Н