Претседателката на Актив на жени пензионерки: „Со граѓански активизам и хуманост се постигнуваат дела“ (ФОТО)

Кога на прагот од осмата деценија од животот прифати да погледне во своето портфолио со сочувани документи и фотографии на граѓански активизам велешанката Неделка Ѓорѓиевска ни раскажа една успешна градска женска приказна за Велес. Во неа главни ликови се десетици велешанки кои во изминатите пет, шест децении биле организаторки и реализаторки на активности, на бројни собири, изложби, натпревари, патувања и награди.

Ѓорѓиевска со особено внимание раскажуваше за посветеноста на Лилјана Андреева, Живка Илиева, Стефка Карага,Натка Поп Стефанова, Томанија Димова, Љупка Арсова, Вера Ефтова, Македонка Јанчевска, Марија Настова, Цветанка Трајкова, Олга Ташева, Мирјана Трајкова, на една Рада и уште многу други велешанки на чии имиња не можеше во моментот да се сети но ги покажуваше на фотографиите. Затоа рече: „Објавете ги овие фотографии, ќе им направиме чест на сите кои заслужиле да ги спомнеме затоа што така никоја од нас нема да биде заборавена“.

Иако е во својата трета доба од животот, пензионерката Неделка Ѓорѓиевска од Велес се уште ја држи снагата и силната волја да работи на правата на жените од градот. Борбениот дух и желбата за волонтеризам не ја напуштиле ниту изминативе четири години кога таа како претседателка и Активот на жени пензионерки не успеале да најдат заеднички јазик со раководството на Здружението , па не можела да работи и да ги организира жените според предвидениот план од годишната програма.

„Активности немаве никакви, пристап немавме во домот. Тоа значи дискриминација на родова еднаквост, обесправени, јас бев психички малтретирана, а за тоа имам и лекарско уверение. Едноставно бевме игнорирани јас и Активот на жени пензионерки. Во Здружението доаѓаа писма за активот, но ништо од тоа не добивавме и не бевме информирани“, рече Ѓорѓиевска.

Таа не дозволила отфрлањето од Здружението и одземањето на просторот во кој претходно се собирале и ги организирале своите активности, да ја спречат да ги собира пензионерките и активно да се вклучат речиси во сите хуманитарни активности. Не можејќи да седи со скрстени раце, Ѓорѓиевска своето искуство како активист во разни организации, го понудила во невладиниот сектор и Општинската организација на Црвен крст. Заедно со останатите пензионерки од Активот учествувале во многубројни хуманитарни активности, помагајќи на стари и изнемоштени лица оставени сами на себе, на социјално загрозени семејства и на сите оние на кои им била потребна помош. Таа вели дека е среќна кога тоа што го има ќе го подели со оние кои немаат ништо. „А многу такви ги има,“ вели денеска Ѓорѓиевска.

Следен чекор во нејзината и хуманитарната активност на активот ќе биде заложбата да се отвори Дом за стари и изнемоштени лица.

„Преку општинската организација на Црвен крст одевме во неколку општини и рурални средини и посетувавме стари и изнемоштени лица. Им носевме пакети со храна и облека. Многу често и јас и моите пријателки од дома нешто ќе приготвебме, ќе усукавме и ќе им однесевме на тие луѓе кои навистина живеат во мизерни услови, запоставени од семејства и разни други околности, особено оние во руралните средини. Бевме на една работилниц во Скопје и таму беа понудени три проекти. Ние одбравме да работиме на проектот за отворање на Дом за стари и изнемоштени лица. Кога се вративме во Велес се размислив и си реков па ние ова не можеме да го оствариме, за тоа ни треба помош. Сега кога го вративме легитимитетот на нашиот Актив во состав на Здружението на пензионери и особено кога новиот претседател Веле Алексоски не поддржува јас искрено се надевам дека ние заедно ќе го отвориме тој Дом со помош на хуманите луѓе и институциите. А јас ќе доживеам да го видам тоа со свои очи,“ рече Ѓорѓиевска.

Оваа хумана жена заедно со останатите активистки на здружението Нада Димова, Нада Драскачева, Орданка Толевска, Ленче Петкова и Софија ќе продолжат да ги анимираат и промовираат а воедно и да ги зајакнуваат правата на жената во 21 век. Никаква сила вели Неделка не може да ги спречи и во иднина да организираат хуманитарни акции преку кои ќе им помагаат на нивните сограѓани. Следна таква хуманитарна акција ќе биде традиционалната манифестација „Благцето на баба“ што ќе се одржи на 14-ти овој месец, на која ќе присуствуваат над две илјади пензионерки од сите краеви на државата.

„Пред дваесет години Лилјана Андреева , Стефка Карага, Живка Илиева и уште неколку други а меѓу нив и јас ја основавме оваа манифестација и многу сме среќни и горди на неа. Годинава славиме еден голем јубилеј, 20 години од постоењето на манифестацијата. За таа цел подготвивме и промотивен материјал во кој ќе ги има сите традиционални македонски благца што ќе ги подготват жените и донесат овде во Велес. Се разбира дека и оваа година манифестацијата ќе има хуманитарен карактер и парите што ќе ги собереме од продадените билети ќе ги донираме на некое сиромашно семејство или на некому кој навистина му треба парична помош, рече Ѓорѓиевска.

Хуманитарната работа, меѓусебната дружба со пензионерките и мислата за подобар живот на секој граѓанин е движечката сила која оваа храбра жена ја води во животот. За тоа сведочат и бројните домашни и меѓународни признанија и благодарници. Учеството во голем број организации и манифстации и својот допринос кој го дала во истите ја прават жена за пример и борец за женските права.

Даниела Саздова