Почна 73 Филмски фестивал во Венеција
Меѓународниот филмски фестивал во Венеција, 73. по ред, отворен е синоќа со филмот „La la Land“ со Рајан Гослинг и Ема Стоун во главните улоги.
Станува збор за ретро џез мјузикл, кој говори за маките и среќата со кои се соочуваат оние кои ги следат своите соништа, а според првите критики, Гослинг и Стоун брилијантно ги одиграле своите улоги.
По отворањето на фестивалот, во знак на почит кон жртвите од земјотресот во централна Италија, синоќа не беше одржана традиционалната гала вечера и прием, пренесува Хина.
Филмот „La la Land“ на режисерот Демијен Шазел е еден од 20-те во конкуренција за наградата Златен лав. Денеска следува проекција на филмот „Les beaux jours d`Aranjuez“ на Вим Вендерс, а станува збор за адаптација на драмата на австрискиот писател Петер Хандке.
Во главната конкуренција на најстариот филмски фестивал во светот, ќе биде прикажан и филмот на Теренс Малик „Voyage of Time“, документарец за вселената, во кој наратор е Кејт Бланшет, а потоа трилерот на модниот дизајнер Том Форд „Nocturnal Animals“. Во конкренција е и „Jackie“, биографски филм за Џеки Кенеди, која ја глуми Натали Портман, потоа „On the Milky Road“ на Емир Кустурица со Моника Белучи, како и „Paradise“ на Андреј Кончаловски.
Вон конкуренција ќе биде прикажана и драмата на тема Втората Светска Војна „Hacksaw Bridge“ во режија на Мел Гибсон, како и римејкот на класичниот вестерн „Седумината величенствени“.
Златен лав за животно дело ќе прими францускиот глумец Жан-Пол Белмондо и полскиот режисер Јержи Сколимовски, додека посебни проекции ќе бидат посветени на режисерите Мајкл Чимин и Абас Киаростами, кои починаа во јули.
Деветчленото жири го предводи британскиот режисер Сем Мендес, а одлуката за наградите ќе биде објавена на последниот ден од фестивалот, на 10 септември.