Во Египет откриен фосил на нов вид кит со четири нозе
Научниците открија нов вид кит со четири нозе во Египет, кој живеел пред околу 43 милиони години. Фосилен водоземец со латинско име Phiomicetus anubis беше откриен во западната пустина во Египет, област на Сахара, која се наоѓа западно од реката Нил. Неговиот череп потсетува на черепот на Анубис, древниот египетски бог на мртвите кој имал глава на чакал, и го добил името по него, пишува Би – Би – Си.
Предците на денешните китови потекнуваат од цицачи слични на елени кои живееле на копното 10 милиони години. Phiomicetus anubis тежел околу 600 килограми, бил долг три метри и имал силна вилица за да фати плен, покажа студијата чии резултати беа објавени во средата во Зборникот на кралското друштво.
Палеонтолозите веруваат дека телото на овој морски цицач било приспособено за пливање и живеење во вода, но и одење по копно. Делови од неговиот скелет беа пронајдени во египетската депресија Фајум, а беше анализиран од научници од Универзитетот Мансур. Во оваа сега пустинска област богата со фосили, порано имало море.
„Phiomicetus anubis е клучен новооткриен вид кит и е важно откритие за египетската и африканската палеонтологија“, вели главниот автор Абдуа Гохар за Ројтерс.
Иако ова не е првпат научниците да откријат фосил на кит, се верува дека Phiomicetus anubis е најраниот тип на „полу-морски“ кит откриен во Африка. Се веруваше дека китовите еволуирале во Јужна Азија пред околу 50 милиони години. Бидејќи нивните тела постепено се прилагодувале сѐ повеќе на водата, тие мигрирале во Северна Африка и Северна Америка, каде што биле пронајдени и други фосили.
Најновото откритие сугерира дека раните китови пливале таму од Јужна Америка.
Палеонтолозите веруваат дека китовите се култен пример за еволуција бидејќи еволуирале од мали копитари во сини китови, а потоа постепено ги освоиле океаните. Тим палеонтолози откри фосил од кит стар 43 милиони години, во Перу во 2011 година. Имаше четири нозе, кожа за пливање и копита. Овој древен кит, токму поради екстремитетите и силната опашка, може да се спореди со дабар или видра.
