Општина Чашка прва ги поддржа болните од пулмонална хипертензија

Од здрава и полна со живот, триесет и шест годишната Ѓурѓица Ќаева преку ноќ стана личност со ретка болест. Таа често чувствува дека и недостига воздух во градите и не може нормално да функционира. Каева ненадејно ја добила болеста пулмонална хипертензија и со неа се бори веќе три и пол години. Ѓурѓица вели дека болеста и ги напаѓа белите дробови, ги стеснува артериите и го покачува притисокот во нив. Со оваа ретка болест тешко се живее особено во земја во која малкумина знаат за неа. Откако се изборила со фактот дека мора да живее со пулмонална хипертензија Ќаева ја започна борбата против неа. Стана член на асоцијацијата за пулмонална хипертензија и ја подига свеста на јавноста за болеста која ако не се третира може да предизвика фатални последици.

„Јас бев здрава, права и имав желба да пешачам, да шетам во шума и да се искачувам во планина. За жал ја добив болеста и сега не можам. Оваа болест може да се добие и од други заболувања, може да биде вродена но и наследна. Како прво и основно потребно е да се подигне свеста кај граѓаните посебно во Македонија затоа што оваа болест постои и многу често ја поистоветуваат со астма. Потребна е рана дијагноза, да се поттикнат млади кадри и да се образуваат за неа. Моментално во Македонија нема регистрирано лек за оваа болест, па болните се снаоѓаат како знаат и умеат,“ рече Ќаева.

Во државата нема ни лек ниту специјализиран центар за лекување но има десетина граѓани заболени од оваа болест. Во светот пак има 12 регистрирани лекови за пулмонална хипертензија. Тие не се достапни за заболените во Македонија кои се снаоѓаат сами, од приватни донации, од сопствен џеб, па дури лековите и ги шверцуваат. Еден месечен третман чини 500 евра, но ако болеста е во поодмината фаза за лекување се потребни од три до десет илјади евра, велат од асоцијацијата.

„Со овие третмани не значи дека пациентите ќе се излечат туку со нив можат да си го продолжат животот. Со користењето на терапијата болните би работеле и не би биле на товар на државата. За кратко време успеавме болеста да влезе во државниот регистар на ретки болести, да се свика комисија за ретки болести и да се направи протокол за тоа што е тоа со што оваа болест се лечи,“ рече претседателката на Асоцијацијата за пулмонална хипертензија „Момент плус“ Љубица Тимова.

Во пресрет на овие луѓе , со целосна поддршка излезе општина Чашка. На располагање им ги понуди сите расположливи капацитети, планинарски домови, воздушните бањи , хотели и болницата за белодробни заболувања во Јасеново.

„Кога си здрав имаш многу желби, а кога здравјето е нарушено имаш само една а тоа е да си здрав. Ние како општина секогаш ќе излегуваме во пресрет на оваа асоцијација. И покрај тоа што сме мала општина имаме големо срце , токму такво какво што и треба на асоцијацијата. Ја ставаме на располагање целокупната општина и нашата конфигурација, нашиот простор каде што се наоѓа општината која што многу може да им помогне на овие луѓе,“ рече градоначалникот на општина Чашка, Горанчо Пановски.

Со широко отворено срце и желба барем малку да им помогнат на овие луѓе се јавија и планинарите од Спортското планинарско друштво „Зелен рај“.

„Во недела на 31 мај ги покануваме сите луѓе, планинари, да го искачиме врвот Љута на планината Кадиица. И да ја анимираме јавноста, да кажеме дека постојат луѓе со многу ретка болест кои секој ден се борат за нивниот живот. Ќе стоиме зад нив со цел барем малку да им го олесниме животот. На овој настан му го дадовме името „Качи се на врв, земи здив за живот“ и ќе биде традиционален, “рече претседателот на планинарското друштво Зоран Игновски.

Младата Ѓурѓица верува во себе и луѓето околу неа. Се надева дека надлежните ќе го чујат нивниот глас и ќе им овозможат и покрај тешката болест да живеат нормално и да бидат корисни и достоинствени граѓани на општеството. /Д.С