Одбележан денот на пожарникарите во Велес (фото)

Со две показни вежби за самоспасување на пожарникарите како и за начинот на дејствување при пожар во зграда денеска во дворот на Територијалната противпожарна едница во Велес беше одбележан 20 мај, денот на пожарникарите. Преку првата вежба седум пожарникари покажаа како се качуваат во колеткивна зграда во којашто при пожар не може да се влезе преку главниот влез. Тие ги користеа скалите кукачи со цел да влезат од спрат во спрат и доколку увидат дека опасноста од пожарот не може да се совлада, со ортома за самоспасување се симнуваат.

Втората вежба ја изведоа пет пожарникари од велешката пожарна и го покажаа начинот на дејствување при пожар, односно постилање на линијата и качување до први спрат од колективна зграда. Во оваа вежба главен и одговорен е командирот којшто треба да процени како треба да се дејствува а потоа и возачот којшто мора од возилото до делницата да донесе вода.

Градоначалникот на Општина Велес Марко Колев им додели благодарница на пожарникарите и рече дека голем дел од работите во Територијалната противпожарна единица во Велес се подобрени но дека во наредниот период ќе продолжат да соработуваат.

-Со мене секогаш ќе имате партнер, соработник како и чесен и искрен однос се со цел да ја вратиме довербата помеѓу општината, пожарникарите како и довербата на граѓаните кон оваа институција, додаде Колев.

Командирот на територијалната противпожарна единица во Велес Љупчо Лепидовски рече дека пожарникарите и во најтешките моменти при интервенција на секој вид на елементарна непогода се најхрабри.

-Пожарникарите ги жртвуваат своите животи со цел да ги спасат животите на граѓаните и нивните материјални добра. Ние пожарникарите имаме една изрека, безбеден град – сигурни граѓани – успешна општина. Да имаме повеќе опрема, помлад кадар, да имаме обуки за пожарникари и помалку интервенции, додаде Лепидовски.

За време на настанот Лепидовски додели плакети за успешна соработка на градоначалникот Колев како и на класната Катерина Стојадиновиќ од средното стручно училиште „Коле Неделковски“ коешто има добиное сертификат за обука на професионалци пожарникари.

Денеска особено внимание за оваа многу значајна професија за безбедноста во градот покажаа дечињата од детската градинка „Димче Мирчев“ којшто беа посебно возбудени што имаа можност да влезат во возилата на ТТПЕ.

Тие исто така испеаа и две песнички со што дополнително го разубавеа одбележувањето на денот на пожарникарите.  

Стефани Манева