Кавадарци, Росоман и Демир Капија не избраа градоначалник во прв круг
Кавадарци, Росоман, Градско и Демир Капија не избраа градоначалник во првиот круг. Ова го покажуваат првичните резултати од ОИК. Нов градоначалник добија Велес и Неготино.
Првичната оценка е дека вчера имавме фер и демократски избори.
Во Кавадарци од вкупниот број запишани избирачи 32.706 гласаа 74,84% или 24.451 граѓани. Од сто отсто обработени гласачки места кандидатот на ТМРО, Верица Арсова освои 165 гласа, Митко Јанчев 12.077, Бетиане Китев 11482 и Борис Давидов 271 глас. Неважечки се 455 ливчиња. Овие резултати покажуваат дека во вториот круг на локалните избори кој ќе се одржи на 29 октомври силите ќе ги одмерат Јанчев и Китев. Меѓу нив разликата е 595 гласа во корист на кандидатот на ВМРО-ДПМНЕ.
Првичните неофицијални резултати покажуваат дека мнозинство во советот обезбеди СДСМ. Тие освоија 10.538 гласа, ВМРО-ДПМНЕ 9146, ГРОМ 1707, група избирачи Ристо Сакалиев 1481 и листата на ТМРО осви 705 гласа. Според овие резултати СДСМ би имал 9 советнички места, ВМРО-ДПМНЕ 8,а по еден советник ГРОМ и Ристо Сакалиев. За советничките листи избројани се 875 неважечки ливчиња.
Во општина Неготино од вкупниот број запишани избирачи 16.084 гласале 78,08% или 12.549 гласачи. Според податоците на ОИК од обработени податоци од сите избирачки места во водство е кандидатот на СДСМ, Тони Делков. На негово конто се 6455 гласа. Кандидатот на ВМРО-ДПМНЕ, Златко Пенков има освоено 5630, а независниот кандидат Ѓорѓи Ајтов 135 гласа. Неважечки за градоначалник се 329 ливчиња.
Мнозинство во советот според првичните резултати има СДСМ. Нивната советничка листа на вчерашните избори освоила 6349 гласа, на ВМРО-ДПМНЕ 5287, независната листа на Сашо Николов освоил 471 глас, додека неважечки за совет се 442 гласа.
Кандидатот за градоначалник на СДСМ во Росоман, Бранко Јанев е во водство со 97 гласа пред кандидатот на ВМРО-ДПМНЕ, Стојанче Лазов. Јанев освои 1338 гласа, а неговиот против кандидат Лазов 1242 глас. Неважечки се 132 ливчиња. За советници Народно движење освоија 320 гласа, ВМРО-ДПМНЕ 1045, Левица 256 и СДСМ 945 гласа.
Во Росоман гласале 2711 граѓани или 79,50% од вкупниот број запишани избирачи 3411. И во оваа општина на 29 октомври ќе се гласа во втор круг.
Во водство е и кандидатот на СДСМ за градоначалник на Демир Капија Лазар Петров. Тој има освоено 1419 гласови, наспроти неговиот против кандидат Трајче Димитриев од ВМРО-ДПМНЕ кој освои 1347 гласа. Избројани се 102 неважечки ливчиња. И во Демир Капија мнозинство во советот освои СДСМ. Со 1431 глас, додека советничката листа на ВМРО-ДПМНЕ има 1327 гласа. Неважечки се 110 гласачки ливчиња.
Aнгел Данов